८ फागुन, काठमाण्डौ ।
धरौटीमा छुटेका राष्ट्रिय क्रिकेट टिमका सदस्य सन्दीप लामिछानेले पाटन उच्च अदालतले गरेको फैसलाविरुद्ध सर्वोच्च अदालत पुगेका छन् । विदेशी भूमिमा राष्ट्रिय टिमबाट खेल्न फैसलाबाट अवरोध पुगेपछि उनी सर्वाेच्च पुगेका हुन् । काठमाडौं जिल्ला अदालतले सन्दीपलाई जेलमै राखेर पुर्पक्ष गर्ने आदेश दिएको थियो ।
त्यसका विरुद्ध सन्दीपले पाटन उच्च अदालतमा पुनरावेदन गरेका थिए । उच्च अदालतले जिल्ला अदालतको फैसला उल्टाउँदै सन्दीपलाई २० लाख धरौटीमा छोडिदियो । तर, उनलाई विदेश जान अदालतले रोक लगाएको छ । यसविरुद्ध सन्दीपले हालेको रिटको फागुन १२ गतेलाई पेसी तोकिएको अदालत स्रोतले जनाएको छ ।
पाटन उच्च अदालतको फैसलाविरुद्ध सरकारी वकिलको कार्यालयले पनि सर्वोच्चमा पुनरावेदन गरेको छ । उसले सन्दीपलाई जेलमै राखेर मुद्दा अगाडि बढाउनुपर्ने माग गरेको छ । उक्त पुनरावेदनमा सर्वोच्चले पाटन उच्च अदालतको फैसलाको मिसिल झिकाउने आदेश दिएको थियो ।
नेपाली क्रिकेट टिम यूएई र पपुवान्यूगिनीविरुद्धको म्याच खेल्न आगामी १३ गते दुबई जाँदैछ । अदालतले विदेश जान रोक लगाएकाले सन्दीप सो टिममा रहने छैनन् । तर, यदि १२ गते सर्वोच्चको पेसीले उक्त रोकका विषयमा आउने निर्णयले सन्दीप यूएई जान सक्ने न सक्ने तय गर्नेछ ।
घरेलु मैदानमा जारी त्रिकोणात्मक श्रृंखलामा सन्दीपले लगातार उत्ृकष्ट खेल प्रर्दशन गरिरहेका छन् । उनले नेपालले ह्याट्रिक गरेको तीन खेलमा समान ३ विकेटका दरले ९ विकेट लिएका छन् । अबका बढीमा १० खेलमा २२ विकेट लिएमा सन्दीपले एकदिवसीय अन्तर्राष्ट्रिय क्रिकेटमा विश्व कीर्तिमान बनाउनेछन् ।
उनी सबैभन्दा कम खेलमा सय विकेट पूरा गर्ने बलर बन्नेछन् । अहिले एकदिवसीय अन्तर्राष्ट्रिय क्रिकेटमा सबैभन्दा कम खेलमा सय विकेट लिने बलरको कीर्तिमान अफगानिस्तानका रसिद खानको नाममा रहेको छ । उनले ४४ खेलमा विकेटको शतक पुरा गरेका थिए ।
रसिदको कीर्तिमान तोडेर विश्वकीर्तिमान राख्दै क्रिकेट दुनियामा नेपालको नाम चम्काउने अवसर सन्दीपसँग छ । सन्दीप एकदिवसीय अन्तर्राष्ट्रिय क्रिकेटमा सबैभन्दा कम खेलमा ५० विकेट पूरा गर्ने खेलाडीको सूचीमा दोस्रो स्थानमा छन् । उनले केवल २२ खेलमा ५० विकेट पूरा गरेका हुन् ।
श्रीलंकाका अजन्था मेन्डिसको नाममा १९ खेलमा ५० विकेट पूरा गरेको विश्व कीर्तिमान रहेको छ । सन्दीप जारी विश्वकप लिग–२ मा सर्वाधिक विकेट लिने बलरको सूचीमा तेस्रो स्थानमा छन् । यो सूचीमा माथि उक्लिने अवसर पनि उनीसित छ । सन्दीपले २३ खेलमा ५१ विकेट हात पारेका छन् ।
३५ खेलमा ओमानका बिलाल खानले ७६ र अमेरिकाका सौरभ नरेस नेत्रभल्करले ५८ विकेट हात पारेका छन् । सन्दीपले उनीहरु दुवैभन्दा १२ खेल कम खेलेका छन् । लिग २ मा सन्दीपले अब ५ वटा म्याच मात्र खेल्न पाउनेछन् ।तर अहिलेको अवस्थामा लिग २ अन्तर्गत नेपालले गर्ने यूएइ भ्रमणमा उनी जान पाउने छैनन् ।
सन्दीपले जारी शृंखलाको अन्तिम खेलमा मंगलबार स्कटल्यान्डसँग खेल्नेछन् । त्यसपछि नेपालले यूएईमा गएर विश्वकप लिग–२ कै अर्को त्रिदेशीय शृंखला खेल्ने छ । सन्दीपले टी–२० अन्तर्राष्ट्रिय क्रिकेटमा पनि ८५ विकेट लिएका छन् ।
उनले ४४ खेलमा यी सफलता हात पारेका हुन् । उनले बढीमा ७ खेलमा १५ विकेट लिए टी–२० अन्तर्राष्ट्रिय क्रिकेटमा सबैभन्दा कम खेलमा सय विकेट पूरा गर्ने बलर बन्नेछन् । रसिद खानले ५३ खेलमा सय विकेट पूरा गरेका थिए ।
