१२ फागुन ,काठमाण्डौ ।
राष्ट्रपतिको उम्मेदवारबारे सत्ता साझेदार नेकपा एमाले र नेकपा माओवादी केन्द्रबीच सहमति नजुटिरहेका बेला पुरानो पाँच दलीय गठबन्धनका नेता छलफलमा जुटेका छन् । विहानैदेखि चलेको नेपाली कांग्रेस, नेकपा माओवादी केन्द्र, नेकपा एस र जसपासहित ४ दलको बैठक वालुवाटारमा जारी छ ।
राष्ट्रपति निर्वाचनका बारेमा राजनीतिक दलहरूबीच रस्साकस्सी भइरहेको बेला प्रधानमन्त्री निवास वालुवाटारमा चार दलको बैठक बसेको हो । बैठकमा नेकपा माओवादी केन्द्रका अध्यक्ष पुष्पकमल दाहाल प्रचण्ड, कांग्रेस सभापति शेरबहादुर देउवा, नेकपा एकीकृत समाजवादीकाअध्यक्ष माधवकुमार नेपाल, जनता समाजवादी पार्टी नेपालका अध्यक्ष उपेन्द्र यादव उपस्थिति छन् ।
यस्तै कांग्रेसका वरिष्ठ नेता रामचन्द्र पौडेल, उपसभापति पूर्णबहादुर खड्का, महामन्त्री गगन थापा तथा माओवादी केन्द्रका वरिष्ठ उपाध्यक्ष नारायणकाजी श्रेष्ठ पनि सहभागी छन् । नेकपा एसले अध्यक्ष माधवकुमार नेपाललाई भावी राष्ट्रपतिका रुपमा अघि सारेको छ भने कांग्रेसले पनि सो पद आफनो पार्टीलाई दिनु पर्ने भन्दै अन्य दलसँग सहमति खोज्ने प्रयास गरिरहेका बेला चार दलका शीर्ष नेताहरूको बैठक सुरु भएको हो।
राष्ट्रपति पदका कारण वर्तमान सत्ता गठबन्धन टुट्ने आशंका भइरहेका बेला पुरानो पाँच दलीय गठबन्धन सक्रिय भएको हो । यसअघि मंगलबार, बुधबार र बिहीबार चरणबद्ध छलफल गरेका नेताहरुले शुक्रबारको बैठकलाई निर्णायक भनेका छन् ।
यी बैठकमा भएका अनौपचारिक छलफललाई सामूहिकरुपमा औपचारिकता दिने र विगतको कांग्रेस नेतृत्वको पाँच दलीय गठबन्धन ब्युँताउने कांग्रेस नेताहरुको प्रयास छ । १० पुसमा कांग्रेससँग समीकरण तोडेर एमालेसँगको गठबन्धनमा प्रधानमन्त्री बनेका दाहालले त्यहीबेला राष्ट्रपति एमालेलाई दिने सहमति जनाएका थिए ।
तर विश्वासको मत लिएको दुई महिना नबित्दै त्यसबेला गरेको वचन फेरेका दाहालले राष्ट्रपति पनि एमालेलाई दिए शक्ति समीकरणमा आफू कमजोर बन्ने भन्दै राष्ट्रपतिको निर्वाचनमा राष्ट्रिय सहमतिको वातावरण बनाउन पहल थालेका हुन् ।
कांग्रेस नेताहरूका अनुसार भने प्रधानमन्त्री दाहालले एक साताअघि नै कांग्रेसलाई राष्ट्रपति दिन सहमति जनाइसकेका छन् । तर माओवादी र नेकपा एसका नेताहरूले भने विगतको नेकपा ब्युँताएर माधवकुमार नेपाललाई राष्ट्रपति बनाउने विकल्पमाथि समेत छलफल गरिरहेका छन् । २५ फागुनमा हुने राष्ट्रपतिको निर्वाचनका लागि शनिबार उम्मेदवारको मनोनयन दर्ता गर्ने कार्यक्रम छ ।
