१३ फागुन, एजेन्सी ।
नेपाल सरकारले पोर्चुगलमा बस्ने सबै नेपालीहरुका लागि एक सूचना जारी गरेको छ । जस्मा राहदानी र कन्सुलर सेवा प्रवाहसम्बन्धी सूचना रहेको छ । उक्त सूचनाअनुसार पोर्चुगलमा बस्ने नेपालीहरूले अब फ्रान्सको पेरिसस्थित नेपाली राजदूतावासका अतिरिक्त नजिकको नेपाली राजदूतावास म्याड्रिड, ब्रसेल्स, बर्लिन र कोपेनहेगनस्थित नेपाली राजदूतावासबाट पनि राहदानी र कन्सुलर सेवा प्राप्त गर्न सक्नेछन् ।
हाल पोर्चुगलमा बस्दै आएका नेपाली नगारिकलाई राहदानी र कन्सुलर सेवा प्रवाहमा परेको कठिनाइका सम्बन्धमा परराष्ट्र मन्त्रालयको यही फागुन ३ गतेको परराष्ट्र मन्त्रीस्तरीय बैठकबाट नयाँ व्यवस्थाको निर्णय गरिएको हो । यसबाट पोर्चुगलमा बस्ने नेपालीहरुलाई राहदानी र कन्सुलर सेवा पाउन सहज हुने भएको छ ।
राहदानीको लागि तोकिएको प्रक्रिया पूरा गरी र कन्सुलर सेवाको लागि खास गरी अधिकृत वारेसनामाको लागि भेटघाटको समय लिएर मात्र राजदूतावासमा जानुपर्ने पेरिसस्थित नेपाली दूतावासले शुक्रबार जारी गरेको सूचनामा उल्लेख छ ।
पोर्चुगलको लिस्वनमा राहदानीको दरखास्त सङ्कलनका लागि राहदानी विभाग, काठमाडौँबाट एउटा टोली पठाउने निर्णय भइसकेको र सोका लागि आन्तरिक प्रक्रिया पूरा भई पोर्चुगल जाने मिति निश्चित भएपछि राजदूतावासले तत्सम्बन्धी विस्तृत विवरण उपलब्ध गराउने जनाइएको छ ।
