१६ फागुन, काठमाण्डौ ।
पुस १० मा बनेको ७ दलीय गठबन्धन छिन्नभिन्न भएको अवस्थामा सोही दिनको सहमतिका आधारमा सरकारमा पुगेको जनमत पार्टीले पुष्पकमल दाहाल नेतृत्वको सरकार नछाड्ने भएको छ । ७ दलीय गठबन्धनमा रहेका माओवादी बाहेक अधिकांश दल सरकार बाहिर रहेका बेला जनमत भने सरकार मै रहेको छ । पछिल्लो समय बनेको ८ दलीय समीकरणमा जनमत पनि सहभागि छ ।
८ दलीय गठबन्धनको बैठकमा जनमतबाट मन्त्री बनेका खानेपानी मन्त्री अब्दुल खानले जनमतको प्रतिनिधित्व गरिरहेका छन् । सरकारमा सहभागिताका सवालमा यसअघि आफूले उद्योग मन्त्रालय मागे भन्दै पदभार नै ग्रहण नगरेका खान र तीव्र असन्तुष्ट जनाउँदै दुई मन्त्रालय माग गरेका जनमत पार्टीका अध्यक्ष डा. चन्द्रकान्त राउत सिकेले आज भने आफुहरु सरकारबाट नबाहिरिने बताएका छन् ।
मंगलवार काठमाडौंमा आयोजित विद्यार्थी संघको केन्द्रिय बैठक तथा प्रशिक्षण कार्यक्रमपछि सञ्चारकर्मीसँग कुराकानी गर्दै अध्यक्ष राउतले जनमत पार्टी सरकारबाट नबाहिरिने बताएका हुन् । अन्य पार्टीहरु आफ्नो माग पूरा नभएकाले बाहिरिएको भन्दै उनले जनमत पार्टीका लागि सरकार छोड्नुपर्ने कुनै परिस्थिति नआएको बताए ।
उनले माओवादी केन्द्रकै नेतृत्वमा सरकार रहेकोले सरकार बदलिएको भन्न नमिल्ने बताए । सरकारमा सामेल भएका दलहरु फेरिने भएपनि सरकार नफेरिने उनको भनाई छ । जनमत पार्टी सरकारमा यथावत रहेको उनले स्पष्ट पारेका छन् । उनले भनेका छन् अरु पार्टीहरु त माग पूरा भएन, कसैलाई राष्ट्रपति भएन, कसैलाई मन्त्रालय भएन भनेर बारिरिएको हो ।
जनमत पार्टीको लागि कुनै त्यस्तो कुनै नयाँ परिस्थिति सिर्जना भएको छैन । अध्यक्ष राउतले राष्ट्रपतिमा आफूहरुले स्वच्छ छवि भएको र दल विशेषको भुमिका नखेल्ने व्यक्ति खोजेको उल्लेख गर्दै सोही बमोजिमको पात्रको रुपमा रामचन्द्र पौडेललाई समर्थन गरेको बताएका छन् । जनमत पार्टी राष्ट्रपति र सभामुख एउटै पार्टीलाई दिनु नहुने पक्षमा रहेकाले पनि पौडेललाई समर्थन गरेको उनले बताए ।
राष्ट्रपति र सभामुख एउटै दलको भएमा निरंकुशता जन्मिने सक्ने उनको तर्क छ । यद्यपि राउतले नागरिकता विधेयक, राजबन्दीको रिहाइ र किसान आन्दोलन लगायतका आफ्नो पार्टीले उठाएको एजेण्डा सम्बोधन हुने अवस्था नआएमा सरकारलाई गरेको समर्थन फिर्ता हुनसक्ने बताएका छन् ।
यिनै माग पूरा गराउन भन्दै जनमत र नागरिक उन्मुक्ति पार्टीले केही साता अघि सहकार्य गरेका थिए । पछिल्लो समय नागरिक उन्मुक्ति पार्टी पनि ८ दलीय गठबन्धनबाट अब पुर्नगठन हुने मन्त्रिपरिषद्मा जाने तयारीमा छ ।
