२१ फागुन, एजेन्सी ।
कोलम्बियामा ’कोकेन हिप्पोज’ को संख्या बढ्न थालेपछि स्थानीय र त्यहाँको सरकारलाई चिन्ता थपिदिएको छ । कोलम्बियन सरकारले आफ्नो देशमा जलगैँडाको एक प्रजाति ’कोकेन हिप्पोज’ को बढ्दो संख्यालाई नियन्त्रण गर्ने अभियान थालेको छ ।
जसअनुरुप कोलम्बियाले दर्जन बढी हिप्पोलाई भारत र मेक्सिको पठाउने तयारी गरेको छ । हाल कोलम्बियामा १३० देखि १६० वटा हिप्पो रहेका छन् । सुरुमा त्यहाँको हिसेन्डा नेपोलेसमा ४ वटा हिप्पोमात्रै थिए । अहिले भने हिप्पोको संख्या ह्वात्तै बढ्न थालेको र उनीहरु मगडेलने रिभर बेसिनसम्म पुग्न थालेका छन् ।
जसकारण त्यहाँका स्थानीय चिन्तित बनेका छन् । दुई दशकमा कोलम्बियामा हिप्पोहरुको संख्या १ हजार ५०० सम्म पुग्ने भन्दै नेचर जर्लनमा प्रकाशित एक लेखमा उल्लेख छ । अधिकारीहरुले ’कन्ट्रासेप्टिभ डार्ट्स’को प्रयोग गरेर हिप्पोको संख्या वृद्धि रोक्ने प्रयास गरेका थिए ।
तर, त्यो अभियानले केही मात्रमा मात्रै सफलता पायो । अब भने कोलम्बियाले ७० वटा हिप्पोलाई भारत र मेक्सिकोको चिडियाखानामा पठाउने तयारी गरेको छ । जसमा ६० वटा भारतमा र १० वटा मेक्सिको पठाइनेछ । हिप्पोलाई अफ्रिका पठाउनेबारेमा भने सहमति हुन नसकेको अधिकारीहरुले बताएका छन् ।
एक जनावरलाई उसको बासस्थानबाट अर्को नयाँ बासस्थानमा पठाउँदा जनावरसँगै भाइरस, ब्याक्टेरिया लगायत पनि आउने भन्दै त्यसले अफ्रिकाको ’इकोसिस्टम’मा नै प्रभाव पार्न सक्ने भएकाले हिप्पोलाई त्यहाँ पठाउन सहमति हुन नसकेको वैज्ञानिक बताउँछन् । कोलम्बियाले बाँकी हिप्पोहरुलाई पनि कसरी व्यवस्थापन गर्ने भन्ने विषयमा अध्ययन गरिरहेको छ ।
