Nepal Times
Nepal Times
3
Shares

इमरान खानको भाषण प्रशारणमा रोक

इमरान खानको भाषण प्रशारणमा रोक

२२ फागुन, एजेन्सी ।

आर्थिक संकटसंग जुधिरहेको पाकिस्तानमा अहिले राजनीतिक अस्थिरता पनि चरमोत्कर्षमा पुगेको छ । पूर्व प्रधानमन्त्री इमरान खानका समर्थकहरु लगातार आन्दोलन गरिरहेका छन् र खान पनि पक्राउ पर्ने आशंका गरिएको छ । यदी इमरान खानलाई पक्राउ गरिए पंजाबसहित देशका कयौं राज्यहरुमा प्रदर्शन उग्र बन्ने चेतावनी दिइएको छ ।

यहिबीच शहबाज शरीफको सरकारमाथि पनि संकटको बादल मडारिएको विश्लेषण भइरहेको छ । शहबाज शरीफको सरकारमा सहभागि भएको पाकिस्तान पिपुल्स पार्टीले गठबन्धनबाट अलग हुने संकेत गरेको छ । पार्टी प्रमुख तथा विदेश मन्त्री बिलावल भुट्टो जरदारीले भनेका छन्, बाढीसंग जुधिरहेको सिंधलाई राहत दिने प्रतिबद्धता सरकारले पुरा गर्न नसके यो गठबन्धनमा रहन सकिदैन ।

उनले बाढी प्रभावित किसानहरुलाई ४.७ अर्ब डलरको सहयोग जुन सरकारले दिने भनेको थियो त्यो अहिलेसम्म किसानहरुले नपाएकोमा पनि आलोचना गरेका छन् । पाकिस्तानको राजनीतिलाई नजिकबाट नियाल्नेहरुका अनुसार भलै बिलावल भुट्टोले किसानहरुलाई राहत दिने नाममा गठबन्धनबाट अलग हुन खोजेजस्तो देखाएपनि उनले शहबाजको सरकारमा संकट मडारिएको देखेरै यसबाट बाहिरिने तरखर गरेका हुन्।

यदी पंजाब र खैबर पख्तुनख्वामा चुनाव भए शरीफले हार्ने भुट्टोको ठहर छ । किनभने यी दुई राज्यमा इमरान खानको पकड बलियो मानिन्छ । यस्तोमा अगाडिको बाटोमा आउने मुश्किललाई आँकलन गरेरै पीपीपीले त्यसअघि नै आफ्नो बाटो अलग गर्न खोजिरहेको देखिन्छ ।

यसैबीच आइतबार इमरान खानलाई पक्राउ गर्न लाहौरस्थित उनको घर पुगेको प्रहरी खाली हात फर्किएको छ । प्रहरी खानको घर पुग्दा हजारौंको संख्यामा पीटीआईका समर्थक उर्लिएका थिए । सो स्थितिलाई नियन्त्रणमा लिन प्रहरी बल नै अपुग देखिएको थियो ।

समर्थकहरुले घेरेपछि प्रहरी खानलाई नलिइ खाली हात फर्किएको हो । प्रहरीले भने तोशाखाना मामिलामा इमरान खान अदालतमा उपस्थिति नभएकाले आफू खानलाई वारेन्ट लेटर दिनका लागि आएको बताएको छ । यद्यपी यसबारे पीटीआईले ७ मार्चमा हुने सुनुवाइमा इमरान खान उपस्थित हुने बताएको छ ।

तर प्रहरीले भने इमरान खान पक्राउ पर्नबाट बच्नका लागि घरबाटै निक्लिएर कतै लुकेको बताएको छ । अधिकारीहरुले प्रहरीले खानको घरभित्रै पसेर छानविन गरेको तर त्यहाँ उनी फेला नपरेको जनाएको छ । एकातिर खानलाई पक्राउ गर्न प्रहरी उनलाई खोजीरहेको बेला नै खानले भने ट्वीट गर्दै शहबाज शरीफमाथि भ्रष्टाचारको आरोप लगाइरहेका थिए ।

उनले ८ अर्ब रुपैयाको मनी लन्ड्रिङको केस शहबाजमाथि थियो तर उनी पूर्व आर्मी चीफ जनरल बाजवाको मद्यतले बचे र केसलाई त्यसै पन्छ्याइदिए भन्दै ट्ीवटरमा लेखेका छन् । शरीफ सरकार र इमरानबीच टकराव बढ्दै जाँदा खानको भाषणहरु लाइभ प्रशारणका लागि पनि रोक लगाइएको छ ।

पाकिस्तान इलेक्ट्रोनिक मिडिया रेग्ुलेटरी अथोरिटीले आइतबारदेखि इमरान खानका भाषणहरु र प्रेस कन्फ्रेन्सहरु लाइभ प्रशारण गर्न रोक लगाएको छ । अब कुनै स्याटालाइट टिभि च्यानलमा उनको भाषण सिधै प्रशारण हुनसक्ने छैन ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.