५ चैत, काठमाण्डौ ।
मंसिर ४ को निर्वाचनमा सांसदको टिकट नपाएपछि नेकपा एमाले छाडेका घनश्याम भुसाल एकीकृत समाजवादीका महासचिव बनेका छन् । आइतवार बसेको एकीकृत समाजवादी पार्टी केन्द्रीय सचिवालय बैठकले भुसाललाई महासचिवको जिम्मेवारीमा लैजाने निर्णय गरेको हो ।
यसअघि महासचिव रहेका बेदुराम भुसाललाई उपाध्यक्षको जिम्मेवारी दिइएको छ । यस्तै बैठकले पार्टीका ४ जना केन्द्रीय उपाध्यक्षहरू घनेन्द्र बस्नेत, केदार न्यौपाने ,धर्मनाथ प्रसाद शाह र केशवलाल श्रेष्ठलाई पार्टीको केन्द्रीय सचिवालयमा सर्वसम्मत मनोनयन गरेको पनि पार्टी प्रवक्ता एवम् उपमहासचिव जगन्नाथ खतिवडाले बताए ।
अब समाजवादी केन्द्रीय सचिवालयको संख्या १९ पुगेको छ । यसअघि सचिवालयमा १२ सदस्य रहेका थिए । एमाले त्यागेर गत मंसिर ४ अघि स्वतन्त्र भएका भुसाल रुपन्देही क्षेत्र नम्बर १ मा चुनावमा लडेका थिए । तर उनले कांग्रेस र माओवादी केन्द्रको साथ पाउँदा पनि पराजय भोगेका थिए ।
त्यसपछि उनी एकीकृत समाजवादीमा प्रवेश गरेका थिए । एकीकृत समाजवादीमा प्रवेश गरेका भुसाल गत पुस ३० गते केन्द्रीय सचिवालय सदस्यमा मनोनित भएका थिए । माधवकुमार नेपालले एमाले विभाजन गरेको डेढ वर्षपछि भुसाल समाजवादीमा प्रवेश गरेका थिए ।
प्रवेशको डेढ महिनामै उनले महासचिवको जिम्मेवारी पाएका हुन् । नेकपा एमालेमा रहँदा भुसाल माधव नेपाल समूहमै थिए । २०७८ असार २७ गते एमाले अध्यक्ष केपी शर्मा ओली र नेपाललाई मिलाउन बनाइएको १० बुँदे सहमतिपत्रका एकजना मस्यौदाकार भुसाल पनि थिए ।
एमाले छाड्नुअघि उनी पार्टीमा स्थायी कमिटि सदस्य थिए । भुसालले २०५३ सालको उपनिर्वाचनमा रुपन्देही २ बाट चुनाव जितेर संसदीय यात्राको थालनी गरेका थिए । २०७४ सालको प्रतिनिधिसभा निर्वाचनमा रुपन्देही–३ बाट भुसाल निर्वाचित भएका थिए ।
२०३३ सालबाटै सक्रिय राजनीतिमा लागेका भुसाललाई मंसिरको चुनावमा एमालेले पार्टीका तर्फबाट उम्मेदवार बन्न बन्चित गरेको थियो । यस्तै चितवनमा भएको १० औं महाधिवेशनमा उपाध्यक्षका लागि उनले चुनावी प्रतिस्पर्धा गरेका थिए ।
