५ चैत, एजेन्सी ।
साउदी प्रो लिगमा अल नासरले पूनरागमन जित दर्ता गरेको छ । घरेलु मैदानमा पछि परेको स्थिति उल्ट्याएर अल नासरले अभामाथि २–१ को पूनरागमन जित निकालेको हो । एमआरसुल पार्क रियादमा शनिबार राति भएको खेलमा अल नासरको पूनरागमन जितमा क्रिस्टियानो रोनाल्डो र एन्डरसन टालिस्काले गोल गरे ।
अभाका अब्देल फटाह एडामको गोल सान्त्वना बन्यो । खेलको २६औं मिनेटमा अब्देलको गोलबाट अल नासर पछि परेको थियो । एक गोलले पछि परेको अल नासरले त्यसपछि पाहुना टोलीलाई लगातार दवावमा राखेपनि गोलको लागि दोस्रो हाफ नै कुर्नुप¥यो ।
७८औं मिनेटमा रोनाल्डोले फ्रिकिकमा सिधै गोल गर्दै खेललाई १–१ गोलको बराबरीमा ल्याए । उनले झन्डै ३५ यार्ड टाढाबाट गरेको शक्तिशाली फ्रिकिकलाई अभाका गोलरक्षकले ठम्याएपनि डाइभ गर्न ढिला गरे । ८०औं मिनेटमा अभा १० खेलाडीमा समेटिन पुग्यो ।
जाकारिया अल सुडानी दोहोरो पहेलो कार्ड खाँदै मैदानबाट बाहिरिए । ८६औं मिनेटमा एन्डरसन टालिस्काले पेनाल्टीमा गोल गर्दै अल नासरलाई २–१ को पूनरागमन जित दिलाए । पेनाल्टी बक्समा अब्देल एडामले ह्यान्ड गर्न पुगेपछि रेफ्रीले अल नासरलाई पेनाल्टी प्रदान गर्द टालिस्का चुकेनन् ।
यस जितसँगै अल नासरले शीर्षस्थानको अल इतिहादसँगको अंक दुरी १ मै छोट्याएको छ । दोस्रो स्थानमा रहेको अल नासरको २१ खेलबाट ४९ अंक छ । समान खेलबाटै इतिहादको ५० अंक छ । पराजित अभा २३ अंक जोडेर १२औं स्थानमा छ। रोनाल्डोले साउदी प्रो लिग फ्रि–किकको गर्जनमा गोल गरे।
उनको गोलको मद्दतमा घरेलु टोली १–० ले पछि परेको खेललाई आफ्नो पक्षमा पार्दै तीन अंक कमाउन सफल भयो। पोर्चुगिज कप्तान आफ्नो करियरमा लामो दूरीबाट फ्री–किक गोल गर्नका लागि माहिर मानिन्छन् । तर पछिल्ला केही वर्षमा रोनाल्डोका फ्रि–किक गोल सुकेका छन्।
यद्यपि, रोनाल्डोले आफ्नो गोलले फ्यानहरूलाई आफ्नो प्रतिभाको सम्झना गराए। बल आभाको पर्खाल हुँदै गएको थियो। तर, शटको शक्ति यति धेरै थियो कि आभा गोलकिपर डेभिस इपासीले केही गर्न सकेनन्। यो क्रिस्टियानो रोनाल्डोको अल–नासरका लागि आफ्नो पहिलो फ्रि–किक गोल हो । यो उनको करियरको ५९ औं थियो। उनले रियादस्थित क्लबका लागि १० खेलमा नौ गोल गरेका छन् र दुई असिस्ट गरेका छन्।