१४ चैत, काठमाण्डौ ।
प्रधानमन्त्री थ्री नेसन्स कप अन्तर्गत लिग चरणको अन्तिम खेलमा आज नेपाल र भुटान भिड्दैछन् । खेल साँझ ६ बजे दशरथ रंगशालामा हुनेछ । दुवै नेपाल र भुटानले समूह चरणमा लाओसको सामना गरिसकेका छन्। नेपालले पहिलो खेलमा लाओसलाई २–० ले पराजित गर्दा भुटान २–१ ले पराजित भएको थियो ।
नेपालले फितलो प्रदर्शन गरेपनि जित हासिल गरेको थियो । भुटान र लाओसको खेल निकै प्रतिस्पर्धात्मक चलेको थियो । आजको खेलमा नेपालले जित वा बराबरी हासिल गरे फाइनलमा स्थान बनाउनेछ । यसबाहेक १ गोलको अन्तरले हार बेहोरेपनि नेपालले फाइनल यात्रा तय गर्नेछ ।
भुटानले भने फाइनल पुग्न कम्तीमा जित हासिल गर्नुपर्ने समिकरण रहेको छ । लाओसको फाइनल पुग्ने भविष्य पनि यसै खेलले निर्धारण गर्नेछ । नेपालको बराबरी वा जितले लाओस र नेपाल फाइनल पुग्नेछन् । भुटानले ३ गोलको अन्तर वा सोभन्दा बढी गोलले जिते मात्र नेपाल बाहिरिने समिकरण रहनेछ ।
भुटानले हार बेहोरेपनि कप्तान चेन्चो ग्याल्सेनले उत्कृष्ट प्रदर्शन गर्दै गोल गरेका थिए । उनी नेपालकै लिग च्याम्पियन मच्छिन्द्रमा अनुबन्धित हुने चर्चा पनि छ । नेपाल बसाइँ लम्ब्याउन उनीमाथि भुटान निर्भर हुनेछ । चेन्चो ग्याल्सेन भुटानको मुख्य हतियार पनि हुन् । निकै छरिता र चलाख उनी प्रदर्शनकै हिसाबले पनि भुटानका आदर्श फुटबलर हुन ।
जर्सी नम्बर ७ लगाउने उनी भुटानी रोनाल्डोको नामले चर्चित छन् । आजको खेललाई नेपालका कप्तान तथा गोलकिपर किरण लिम्बु र भुटानका कप्तान तथा फरवार्ड चेन्चो बीचको प्रतिस्पर्धाको रुपमा लिइएको छ । व्यवसायिक करिअरमा विगत केही वर्षदेखि किरण र चेन्चो एउटै क्लबबाट खेल्छन्।
भारतको पञ्जाब एफसीबाट यो सिजनसँगै खेलेका किरण र चेन्चोले आइलिगको उपाधि उचाल्ने अवसर पाएका थिए । यसपटक एकअर्काविरुद्ध मैदान उत्रन लागेका दुवै खेलाडी उत्साहित छन् । प्रतियोगिताअघि किरण र चेन्चोले एकअर्काको टिमलाई सम्मान गर्ने बताएका थिए ।
यद्यपी भुटानलाई नेपालका लागि बलियो प्रतिद्वन्द्वी मानिदैन । भुटानसँग अहिलेसम्म खेलेका १४ खेलमा नै नेपाल विजयी भएको छ । नेपालले फुटबल इतिहासमा सबैभन्दा ठूलो जित पनि भुटानविरूद्ध नै हासिल गरेको छ । सन् १९९९ मा नेपालले भुटानलाई ७–० गोलले पराजित गरेको थियो ।
