Nepal Times
Nepal Times
3
Shares

ट्रम्पविरुद्ध ३० अभियोग, पूर्व राष्ट्रपतिको नाक कटाए

ट्रम्पविरुद्ध ३० अभियोग, पूर्व राष्ट्रपतिको नाक कटाए

१७ चैत, एजेन्सी ।

अमेरिकी पूर्व राष्ट्रपति डोनाल्ड ट्रम्प आपराधिक अभियोग लाग्ने संयुक्त राज्य अमेरिकाको पहिलो पूर्वराष्ट्रपति बनेका छन् । पूर्वपोर्नस्टार स्टर्मी डेनियललाई एक लाख ३० हजार अमेरिकी डलर भुक्तान गरेको विषयमा म्यानहट्टन जिल्ला अदालतको निर्णायकमण्डलले ट्रम्पमाथि एक वर्ष लामो अनुसन्धान गरेको थियो ।

त्यसपछि निर्णायकमण्डलले उनलाई अभियोग लगाउने निर्णय गरेको अन्तर्राष्ट्रिय सञ्चारमाध्यमले जनाएका छन् । पूर्वराष्ट्रपतिविरुद्ध अभियोग लगाइएको अमेरिकी राजनीतिक इतिहासकै यो पहिलो घटना हो । ७६ वर्षीय ट्रम्पमाथि लगाइएको आरोपको विवरण भने सार्वजनिक गरिएको छैन ।

म्यानहट्टन जिल्ला न्यायाधिवक्ता एल्भिन ब्रागको कार्यालयले बिहीबार साँझ ट्रम्पका वकिलहरूसँग अदालतमा आत्मसमर्पणका लागि समन्वय गर्न सम्पर्क गरेको जनाएको छ । योसहित ट्रम्पले व्यापार ठगीलगायत करिब ३० मुद्दाको सामना गर्न सक्ने बताइएको छ । ट्रम्पका वकिलले उनले मंगलबार आत्मसमर्पण गर्ने र अदालतमा उपस्थित हुने पुष्टि गरेका छन् ।

ट्रम्पले समर्थन र सहयोगका लागि रिपब्लिकन सांसदहरूलाई आह्वान गरेका छन् । अभियोग घोषणा गरिएपछि ट्रम्पले एक लामो वक्तव्यमा आफूविरुद्ध नक्कली, अपमानजनक आरोप लगाइएको जिकिर गरेका छन् । आफूलाई अमेरिकी जनताको साथ रहेको उनको भनाइ छ ।

अन्तर्राष्ट्रिय सञ्चारमाध्यमका अनुसार ट्रम्पका समर्थक उनको निवास पाम बीच मार ए लागोबाहिर भेला भएका छन् । फ्लोरिडामा बस्ने ट्रम्प औपचारिक गिरफ्तारी र अदालतको पहिलो सुनुवाइका लागि न्युयोर्क जाने अपेक्षा गरिएको छ । ट्रम्पमाथि अभियोग लागेसँगै न्युयोर्क प्रहरी विभागलाई थप प्रहरी तैनाथका लागि तयार रहन आदेश दिइएको छ ।

ट्रम्पले यस मामिलामा आफूमाथि लगाइएको आरोपलाई खारेज गर्दै आएका छन् । ट्रम्प फ्लोरिडामा बस्छन् र उनी अदालतमा पहिलो सुनुवाइका लागि अदालतमा आउन सक्ने विश्वास गरिन्छ। ट्रम्पको रक्षा टोलीका अनुसार पूर्व अमेरिकी राष्ट्रपतिले अर्को साता आत्मसमर्पण गर्न सक्नेछन् । अदालतमा ट्रम्पको सुरक्षा गर्ने जिम्मेवारी अमेरिकी गुप्तचर निकायले पाएको छ ।

सीएनएनले यो मुद्दासँग सम्बन्धित २ स्रोतलाई उद्धृत गर्दै ट्रम्पमाथि व्यवसायिक धोखाधडीसम्बन्धी ३० भन्दा धेरै अभियोग लगाइएको बताएको छ । जनवरी २०१८ मा अमेरिकी अखबार वाल स्ट्रीट जर्नलले एउटा लेखमा राष्ट्रपति ट्रम्पका तत्कालीन वकिल माइकल कोहेनले अमेरिकी राष्ट्रपति चुनावको एक महिना अघि अक्टोबर २०१६ मा पोर्न स्टार स्टर्मी डेनियललाई १ लाख ३० हजार डलर तिरेको दाबी गरिएको थियो। जर्नलका अनुसार यो पैसा उनले ट्रम्पसँगको अफेयरको बारेमा कुनै पनि कुरा सार्वजनिक नगर्ने सम्झौता अन्तर्गत दिइएको हो ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.