Nepal Times
Nepal Times
3
Shares

बेन्जिमाले ७ मिनेटमा गरे ह्याट्रिक,चेल्सीले प्रशिक्षक निकाल्यो

बेन्जिमाले ७ मिनेटमा गरे ह्याट्रिक,चेल्सीले प्रशिक्षक निकाल्यो

२१ चैत, एजेन्सी ।

फ्रेन्च लिग वानको शीर्षस्थानमा रहेको पेरिस सेन्ट जर्मेन (पिएसजी) ले लिग वानमा अर्काे हार बेहोरेको छ । आइतबार लियोनसँग पिएसजीले १–० गोलको हार बेहोरेको हो । लियोनको जितमा बार्कोलाले खेलको ५६ मिनेटमा गोल गरेका थिए । लिगमा पिएसजी पाँच खेलमा पराजित भइसकेको छ ।

यो सिजन सबै प्रतियोगिता गरी पिएसजीको यो सातौं हार हो । पिएसजीको २९ खेलबाट ६६ अंक छ । दोस्रो स्थानको लेन्सको ६० र तेस्रो स्थानको मार्सेको पनि ६० अंक नै छ । पिएसजीले विश्वकपको अन्त्यदेखि सबै प्रतियोगितामा आफ्ना १८ खेलमध्ये सात हारिसकेको छ । खेल सकिएपछि फ्यानले मेसीलाई लक्षित गर्दै सिठ्ठी फुकेका थिए ।

लगातार दुई सिजन पिएसजी च्याम्पियन्स लिगमा राम्रो प्रदर्शन गर्न चुकिरहेको छ । मेसीले पिएसजीसँग आफ्नो सम्झौता लम्ब्याउने विषयमा कुराकानी गरिरहेका छन् । तर बार्सिलोनाले पनि उनलाई आफ्नो करिअरको अधिकांश समय बिताएका क्लबमा फर्किने विषयमा सम्पर्क गरेको छ ।

यता हार ब्यहोरेपछि लन्डन क्लब चेल्सीले आफ्नो मुख्य प्रशिक्षक ग्राहम पोटरलाई बर्खास्त गरेको छ । शनिबार घरेलु मैदानमा एस्टन भिल्लासँग २–० ले पराजित भएसँगै पछि चेल्सीले सात महिनाभन्दा कम समयमै प्रशिक्षक पोटरलाई बर्खास्त गरेको हो । पोटरको प्रशिक्षणमा ३२औं खेलमा चेल्सीको यो १२औं हार हो ।

यो सिजन खेलाडी अनुबन्धमा ५५० मिलियन पाउन्डभन्दा बढी रकम खर्च गरेको चेल्सी प्रिमियर लिगमा ११औं स्थानमा झरेको छ । क्लबका मालिकहरूले पोटरलाई बर्खास्त गर्नमा ‘निराश’ भएको बताएका छन् । पोटरको बर्खास्तसँगै यस सिजन प्रिमियर लिगमा १३ प्रशिक्षक परिवर्तन भएका छन् ।

लेस्टरले आइतबारै ब्रेन्डन रोजर्सलाई बर्खास्त गरेको थियो । उता स्पेनिस ला लिगामा रियल म्याड्रिडले सानदार जित हात पारेको छ। आइतबार भएको खेलमा रियलले रियल भलडोलिडलाई ६–० गोलले हरायो। खेलमा करिम बेन्जिमाले पहिलो हाफमै ह्याट्रिक पूरा गरेका थिए।

उनले खेलको २९,३२ र ३६ मिनेटमा गोल गर्दै सात मिनेटको अन्तरमा ह्याट्रिक पूरा गरे। रियलका लागि थप गोल रोद्रिगोले २२ मिनेट, एसेन्सियोले ७४ र भाज्क्युले दोस्रो हाफको इन्जुरी टाइमको पहिलो मिनेटमा गोल गरेका थिए । जितसँगै अंक तालिकाको दोस्रो स्थानमा रहेको रियलको २७ खेलबाट ५९ अंक छ। शीर्ष स्थानको बार्सिलोनाको ७१ अंक छ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.