२६ चैत, काठमाण्डौ ।
नेपालको राजनीतिमा एकता र विभाजन नौलो विषय होइन। अघिल्लो दिन तथानाम गरेर भोलि पल्ट कुममा कुम जोडेर हिड्ने राजनीतिक दलका नेताहरु यहाँ प्रशस्त छन् । यसैले प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड भन्ने गर्दछन् कि राजनीतिमा असम्भव केही छैन् । यो संभावनै संभावनाको खेल हो ।
राजनीतिमा स्थायी शत्रु र मित्र हुँदैन भनेर त नेपालका राजनीतिक दल र नेताहरुले पटक पटक पुष्टि गरिसकेका छन् । त्यसकै पछिल्ला उदाहरण हुन् पुष १० को सहमति र फागुन २५ को राष्ट्रपति अनि चैत ३ को उपराष्ट्रपति निर्वाचन । पछिल्लो समय त्यही स्थायी शत्रु र मित्र हुँदैनन् भन्ने वाक्यांशलाई थप परिभाषित गर्दै प्रधानमन्त्री प्रचण्ड अहिले प्रमुख प्रतिपक्ष दल नेकपा एमालेका सचिव तर १० वर्षे शसस्त्र युद्धमा निकटस्थ रहेका सहकर्मी लेखराज भट्टलाई खोज्दै उनकै घर पुगेका छन् ।
युद्ध देखि माओवादी र एमालेबीच एकता भएर नेकपा बनेपछि पनि सँगै रहेका उनीहरु सर्वोच्चको एमाले र माओवादी ब्युँताउने फैसलापछि अलग राजनीतिक यात्रा तय गर्न पुगे। भट्ट एमालेमै रहे भने प्रचण्ड पूर्ववत् पार्टीको नेतृत्व गर्दै पुनर्जीवित माओवादीको अध्यक्ष भएर अलग बन्न पुगे। भट्ट लगायतले एमाले रोजेपछि प्रचण्डले यसअघि विभिन्न तिखा टिप्पणीहरु गरेका थिए ।
भट्ट अहिले एमालेको सचिव छन्। यता, उनकै पूर्वसहकर्मी तथा सुप्रिमो अध्यक्ष प्रचण्ड भने नेपालको कार्यकारी प्रमुख प्रधानमन्त्री रहेका छन्। उनै भट्टका पूर्वसहकर्मी हालका प्रधानमन्त्री प्रचण्डले कैलालीमा एक कार्यक्रममा पुगेको अवसरमा आफ्नो पूर्वसुहकर्मीलाई भेट्न पुगेका छन्।
गोदाबरी– १ अत्तरियास्थित भट्टकै निवासमा पुगेर गरिएको भेटवार्तामा प्रचण्डले राजनीतिक यात्राको क्रममा आफू लामो समयसम्म सोही घरमा बसेको स्मरण गरे। उनले आफ्ना पूर्वसहकर्मी भट्टको परिवारले घरमा बसेको स्मरण गर्दै आफ्नो लागि छुट्टै कोठा नै उपलब्ध गराइएको विगत स्मरण गर्दै राजनीति गर्ने क्रममा आफ्ना लागि छुट्टै कोठानै उपलब्ध गराएको उल्लेख गरे।
प्रचण्डसँग भट्टको सहयात्रा निकै पुरानो हो। २०४१ सालमा मोहनविक्रम सिंहसँग अलग भएर नेकपा(मशाल) हुँदै एकताकेन्द्र र माओवादी जनयुद्धसम्म निरन्तर यी दुबैले सहयात्रा गरेका हुन्।
सोही विगतलाई स्मरण गर्दै भट्टसँगको भेटपछि प्रचण्डले भने, ‘यो घरसँग मेरो ४० वर्षदेखिको सम्बन्ध हो।मेरा लागि छुट्टै कोठानै घरको माथिल्लो तलामा छ। लेखराजजी राजनीतिक व्यक्तित्व भएपछि कतिपय राजनीतिक विषयमा छलफल भयो। मेरो यो घरसँग भावनात्मक सम्बन्ध छ।’
मोहनविक्रम सिंहसँग अलग भएर २०४१ सालमा नेकपा(मशाल) गठन गरिए यता निरनतर रुपमा प्रचण्डलाई भट्टले साथ दिँदै आएका थिए।सर्वोच्चको २०७७ फागुन २३ को फैसलापछि एमाले र माओवादी मिलेर बनेको नेकपा विभाजन भएर दुबै पार्टी पूर्ववत अवस्थामा पुगेपछि अहिले छुट्टाछुट्टै पार्टीमा लागेका हुन्।
