२६ चैत, काठमाण्डौ ।
काठमाडौं महानगरपालिकाका मेयर बालेन्द्र शाहले सामाजिक संजालमा गरेको घोषणा बमोजिम आजबाट सिंहदरबारको फोहोर उठ्न बन्द भएको छ । हिजो शनिबार भएकाले बालेनको घोषणा आजबाट कार्यान्वयन भएको देखिएको छ । महानगर स्रोतका अनुसार सिंहदरबारमात्र नभएर प्रधानमन्त्री निवास बालुवाटार र राष्ट्रपति निवास शीतल निवासको समेत फोहोर नउठाउन निजी कम्पनीहरूलाई निर्देशन दिइएको छ।
निजी कम्पनीहरूले ती स्थानको फोहोर उठाएर टेकुमा ल्याउने गर्छन् । टेकुबाट महानगरले तिनपिप्लेमा लैजान्छ । यदि जबरजस्ती फोहोर उठाइएमा टेकुमा खसाल्न नदिने चेतावनीसमेत महानगरले दिएको बताइएको छ । महानगरलाई भइरहेको ‘असहयोग’ बारे सरकारले कुनै प्रतिबद्धता नगरुञ्जेल फोहोर नउठाएर दबाब दिने रणनीति मेयरले लिएका हुन् ।
हिजो शनिबार मेयर शाहले फेसबुकमा लेख्दै सिंहदरबारको फोहोर नउठ्ने बताएका थिए । उनले साच्चिकै देश सफा गर्नु परे, त्यहाँका नेताहरूलाई सिसडोलमा डम्प गर्नुपर्ने बताएका थिए । शनिबार एकपछि अर्को स्टास लेख्दै बालेनले सरकारमाथि निशाना साधेका थिए । फेसबुक एकाउण्ट र पेजमा फरक–फरक स्ट्याटस लेख्दै संघीय सरकारमाथि खनिएका थिए ।
उनले आप्नो फेसबुक एकाउण्टबाट सरकारको कुनै इज्जत नगर्ने बताएका थिए । ’इण्डिया र चाइनाले बनाएको सरकारको कुनै इज्जत गर्दिन् म’ मेयर बालेनले फेसबुक अकाउण्टबाट प्रश्न गरेका छन् ’नेपाल स्वाधीन कहिले हुने ? आफ्नो अस्तित्व कहिले बनाउने ? लाज लाग्दैन ?’ त्यसपछि बालेन नेपाल प्रहरीमाथि जाइलागे । उनले फुटपाथ मिचेर प्रहरी बिट बनाएको भन्दै आक्रोश पोखे ।
महानगरपालिका भित्र फुटपाथ मिचेर बनाइएको भन्दै प्रहरी बिटहरुको तस्विर पनि उनले सार्वजनिक गर्दै लेखे, ‘फुटपाथ सँधै मान्छे हिड्नका लागि प्रयोग हुनु पर्छ भनेर हामीले फुटपाथमा व्यापार गर्न रोकेका छौँ । यो नियम सर्वसाधारणका लागि मात्रै होइन । सबैका लागि हो र हुनु पर्छ’, उनले फेसबुकमा लेखेका छन, ‘कानुन कार्यान्वयन गर्ने नेपाल प्रहरीले नै बाटो मिचेर आफ्नो संरचना बनाउँछ भने त्यो गलत हुन्छ ।
त्यो संरचना प्रहरी आफैले हटाउनुहोला, नत्र समतामूलक कानुनको प्रयोगको लागि पनि हामी ती संरचना हटाउन बाध्य हुनेछौँ ।’ मेयर बालेनले केही समयअघिदेखि सरकारले असहयोग गर्दै आएको बताएका थिए । दुई दिनअघि पनि गैरीगाउँमा रहेको सुकुम्वासी बस्तीमा डोजर चलाउन उनी असफल भएका थिए ।
सुकुमवासी बस्तिमा डोजर चलाउने बालेनको योजना गृहमन्त्रालय र प्रहरीको असहयोगका कारण असफल भएको थियो । डोजर ल्याउने बाटोमा स्थानीयवासीले अवरोध गरेपछि बालेनले प्रहरीको सहयोग खोजेका थिए । उनी आफैं सिनामंगलस्थित सशस्त्र प्रहरीको गणमा पुगेर सहयोग मागे । तर, सशस्त्रले माथिको आदेश नभएको भन्दै आफ्नो लाचारी दर्शाएपछि बालेन निराश भएका थिए ।
यसको झोक उनले सामाजिक सञ्जालमा पोखेका हुन् । तर बालेनको यस्तो स्टासप्रति राजनीतिक दलका नेताहरुले भने गैरजिम्मेवार हर्कत भएको प्रतिक्रिया दिएका छन् । यद्यपि सामाजिक सञ्जालका आमप्रतिक्रियाहरूमा भने उनकै पक्षमा समर्थन देखिन्छ । बालेनको सचिवालयले भने एक–दुई दिनमा यसबारे आधिकारिक जानकारी दिइने बताएको छ।
