२६ चैत, एजेन्सी ।
रुसको आक्रमणका बीच केही महिनाको प्रयासपछि युक्रेन पुनः विद्युत् निर्यात गर्न तयार भएको छ। रसियाको आक्रमणबाट ध्वस्त भएको उर्जा प्रणालीलाई ६ महिनाको प्रयासमा पहिलेकै स्थितिमा फर्काएर युक्रेन बिजुली निर्यातका लागि तयार भएको हो।
रसियाको आक्रमणबाट गत अक्टोबर महिनामा युक्रेनको उर्जा प्रणाली र विद्युत्सँग सम्बन्धित संरचनामा क्षति पुगेको थियो। यो हिउँदे सिजनमा युक्रेनका धेरै शहरले लोडसेडिङको समस्या भोगे। केही शहरहरु महिनौंसम्म अँध्यारो रहे। जसकारण युक्रेनले विद्युत् निर्यात रोकेको थियो। तर अब भने युक्रेन क्षतिग्रस्त संरचनालाई मर्मत गरेर पुनः बिजुली निर्यातका लागि तयारा भएको छ।
युक्रेनका उर्जामन्त्री हर्मन हलुश्चेन्कोले निर्यात कार्यान्वयन गर्ने आदेशमा हस्ताक्षर गरेका छन्। यद्यपि स्थानीय ग्राहकहरु प्राथमिकतामा रहेका बताइएको छ। उर्जामन्त्री हलुश्चेन्कोका अनुसार प्रणालीबाट विगत २ महिनादेखि अतिरिक्त क्षमतामा उत्पादन भइरहेको थियो र युक्रेनीहरुको प्रतिबन्धको सामना गरिरहेका थिएनन्।
‘सबैभन्दा कठिन जाडो बितिसकेको छ,’ हलुश्चेन्को भने, ‘अर्को चरण भनेको बिजुली निर्यात सुरु गर्नु हो, जसले हामीलाई क्षतिग्रस्त र क्षतिग्रस्त उर्जा पूर्वाधारहरूको आवश्यक पुनर्निर्माणको लागि थप वित्तीय स्रोतहरू आकर्षित गर्न अनुमति दिनेछ।’
यद्यपि देशको बिजुली नेटवर्क सञ्चालक युक्रेनेर्गोले चेतावनी दिएको छ कि रुसी आक्रमण रोकिनेमा युक्रेनले भरोसा गर्न सक्दैन। युक्रेनेर्गोले शनिबार बताएअनुसार रसियाले युद्धको क्रममा उर्जा केन्द्रहरुमा हालसम्म १ हजार २०० भन्दा बढी मिसाइल र ड्रोनहरु प्रहार भएका छन्।
