३० चैत, एजेन्सी।
राष्ट्रिय महिला फुटबल टोलीका चार खेलाडी एकै पटक भारतको शीर्ष डिभिजन लिग भारतीय महिला लिग (आईडब्लूएल) खेल्न त्यसतर्फ लागेका छन् । राष्ट्रिय टोलीकी गोलकिपर तथा कप्तान एन्जिला तुम्बापो सुब्बा, फरवार्ड सावित्रा भण्डारी, मिडिफल्डर रेनुका नगरकोटे र सरु लिम्बु भारत गएका हुन् ।
घरेलु फुटबलमा चारै खेलाडी लिग च्याम्पियन एपिएफमा आबद्ध छन् । एन्जिलाले सेथु एफसी, सावित्राले गोकुलम केरेला तथा रेनुका र सरुले नव प्रवेशी क्लब किक स्टार्टबाट खेल्नेछन् । यसअघि नयाँ सिजनका लागि गीता राना र एन्जिला तुम्बापो सुब्बा सेथुमा अनुबन्धित भएपनि लिग स्थगित हुँदा खेल हुन सकेन ।
त्यसयता गीता चोटका कारण मैदानबाहिर छिन् । सावित्राले यसअघि गोकुलमबाट २ सिजन र सेथुबाट एक सिजन खेलेकी थिइन् । पछिल्लो पटक गोकुलमले उपाधि जित्दा सावित्रा सर्वाधिक गोलकर्ता बनेकी थिइन् । त्रिभुवन आर्मी क्लबकी दिपा शाही पनि केहि दिनपछि लिग खेल्न भारत जाने तयारीमा छिन् ।
उनी लर्ड्स एफएबाट लिग खेल्नेछन् । यसपटक १६ टोली सम्मिलित रहेको लिग वैशाख १२ गतेबाट सुरु हुनेछ । सहभागी टोलीलाई ८–८ टोलीको दुई समूहमा विभाजन गरिएको छ । सेथु, किक स्टार्ट, लार्ड्स समूह बीमा छन् भने सावित्रा सम्मलित गोकुमल समूह एमा रहेको छ । दिपा अनुबन्धित लर्ड्स र सावित्राको गोकुलम दुवै केरला लिगमा खेल्ने गर्छन् ।
भारत जानुअघि एञ्जिलाले भनिन्, ‘पहिलो पटक भारतीय लिगका लागि जाँदैछु । यो अघि गीता र म दुवै एकै टोलीमा भए पनि गीता चोटको कारण जान पाउने छैनन् । यस्तै सरुले भनिन्, ‘पहिलो पटक लिग खेल्न जान लागेको छु। उत्साहित छु, रेनुका पनि भएको कारण सजिलो भएको छ ।
यो पटक दुवै जना एकै पटक खेल्न पाउँछौँ भन्नुभएको छ त्यसकारण पनि सहज होला।’ रेनुकाले भनिन्, ‘साम्बा र अनिताले खोलेको व्यवसायिक लिगको बाटोमा अहिले महिला खेलाडीहरु बढिरहेका छन्। त्यसकारण आईलिगमा अझै महिला खेलाडीहरु बढ्नेछन् भन्ने आशा छ।
’ त्रिभुवन विमानस्थलमा सावित्राले भनिन्, ‘भारतीय लिगमा सुरुवातमा अनिता बस्नेत र म सहभागी भएर सम्भावना देखाएका थियौँ, अन्य खेलाडीको राम्रो प्रर्दशनको कारण पनि उनीहरुले स्थान बनाएका छन् त्यो हाम्रो लागि राम्रो अवसर हो । महिला खेलाडीको सख्या बढ्दा खुसी लागेको छ। आगामी दिनमा अझै थपिनेछन् भन्ने आशा छ।’
