२६ बैशाख, विराटनगर । एसियन क्रिकेट काउन्सिल (एसीसी)को आयोजनामा हुने एसिया कप क्रिकेट प्रतियोगिता पाकिस्तानबाट श्रीलंका सर्ने सम्भावना देखिएको छ ।
पछिल्लो समय भारत र पाकिस्तानबीच बढ्दै गएको विवादका कारण पाकिस्तानमा एसिया कप नहुने सम्भावना बढेपछि एसीसीले पाकिस्तानबाट प्रतियोगिता सार्ने तयारी गरेको हो ।
बीसीसीआई सचिव जय शाहलाई उद्घृत गर्दै भारतीय सञ्चारमाध्यम इन्डियन एक्सप्रेसले उक्त कुरा उल्लेख गरेको छ । श्रीलंका, बंगलादेश र अफगानिस्तानले उक्त निर्णयको समर्थन गरेका छन् ।
प्रतियोगिता हुने स्थानको अन्तिम निर्णय यही महिनाको अन्तिममा भइसक्ने अपेक्षा गरिएको छ । प्रतियोगितामा पाकिस्तानको सहभागिता हुने कुरामा भने आशंका सिर्जना भएको छ ।
पाकिस्तानमा नगरिए बहिष्कार हुने सक्ने सम्भावना देखिएको छ । पाकिस्तान क्रिकेट बोर्ड (पीसीबी) ले प्रतियोगिता पाकिस्तानमा गर्ने कुरामा जोड दिइरहेको छ । तर श्रीलंकामा गर्ने कुरामा बीसीसीआईले एसीसीका अन्य सदस्य राष्ट्रहरूको समर्थन पाएको दाबी भारतीय सञ्चार माध्यमको छ । त्यसकारण उक्त निर्णयको औपचारिकता मात्रै बाँकी रहेको बताइएको छ ।
भारतले पाकिस्तानमा खेल्न अस्वीकार गरेपछि पीसीबीले एसिया कप आयोजना गर्न हाइब्रिड मोडेल प्रस्ताव गरेको थियो।
भारतको खेल मात्र दुबईमा आयोजना हुने बताइएको थियो । तर त्यसलाई समेत भारतले स्वीकार गरेको छैन । दुबईले सेप्टेम्बर महिनामै सन् २०१८ को एसिया कप आयोजना गरेको थियो । असाध्यै गर्मीका कारण खेल्न मुश्किल परेको गुनासो खेलाडीहरुले गरेका थिए ।
एसीसीले आगामी हप्ताहरूमा अन्तिम निर्णयमा पुग्ने तयारी गरेको छ । श्रीलंकामा प्रतियोगिता सारिएको असर भने आगामी विश्वकपमा समेत देखिन सक्ने बताइएको छ । भारत आयोजक रहेको विश्वकपमा पाकिस्तानको सहभागिता नहुन सक्ने अनुमान गरिएको छ ।
नेपालले पनि यस पल्ट एसिया कप खेल्दैछ । एसीसी पुरुष प्रिमियर लिगको बिजेता बन्दै नेपालले आफ्नो स्थान पक्का बनाएको हो । नेपालको समूहमा भारत र पाकिस्तान रहेका छन् ।
एसिया कपमा अफगानिस्तान, बंगलादेश र श्रीलंका गरी ६ देशले खेल्दैछन् । प्रतियोगिता भएमा नेपालले पहिलोपल्ट एसिया कपमा खेल्ने अवसर पाउनेछ । नेपालले यसअघि छनोट भएर पनि प्रतियोगिता नहुँदा खेल्न पाएको थिएन ।
