३० जेठ, एजेन्सी ।
नेपाली राष्ट्रिय महिला फुटबल टिमकी चर्चित स्टार स्ट्राइकर साबित्रा भण्डारीले यूरोपेली क्लबबाट लिग खेल्ने भएकी छन् । मंगलबार इजरायलको शिर्ष डिभिजन क्लब हापोएल रानाना महिला फुटबल क्लबले आफ्नो सामाजिक सञ्जाल मार्फ साबित्रालाई २०२३÷२४ सिजनका लागि अनुबन्ध गरेको जनाएको छ ।
दक्षिण एसियामा सर्वोत्कृष्ट स्ट्राइकरको पहिचान बनाएकी साबित्राले राष्ट्रिय टिमबाट ४३ खेल खेल्दा ४३ गोल गरिसकेकी छन् । साबित्राले घरेलु फुटबल एपीएफ क्लबबाट खेल्ने गर्छिन् । साबित्रा भारतमा हुने महिला लिगमा लगातार तीन सिजन च्याम्पियन बनेकी छन् । पहिलो सिजन सेथु फुटबल क्लबबाट खेल्दा साबित्राले ७ खेलमा १५ गोल गरेकी छन् ।
दोस्रो र तेस्रो सिजन गोकुलम केरेलाको प्रतिनिधित्व गर्दै उनले कुल ४५ गोल गरेकी छन् । उनी अघिल्लो महिना मात्रै सम्पन्न भारतिय महिला लिगको सर्वाधिक गोल कर्ता पनि हुन् । सावित्रा आबद्द गोकुलम केरेलाले उपाधि जितेको थियो । सावित्राले प्रतियोगिता भर ३० गोल गर्दै सर्वाधिक गोलकर्ताको अवार्ड जितेकी थिइन् ।
सावित्रा युरोपेली क्लबमा अनुबन्धित हुने पहिलो नेपाली खेलाडी बनेकी छन् । नेपाली राष्ट्रिय महिला पुटबल टिमकी सदस्य सावित्रा दशककै उत्कृष्ट खेलाडी घोषित भइसकेकी छन् । नेपाल खेलकुद पत्रकार मञ्च (एनएसजेएफ) ले ०७८ सालमा आयोजना गरेको १८औं संस्करणको अवार्ड समारोहमा फुटबलर सावित्रा महिलातर्फ प्लेअर अफ दि डिकेड घोषित भएकी थिइन ।
सावित्राले एकपटक वर्षको उत्कृष्ट खेलाडीको अवार्ड समेत जितिसकेकी छन् । पछिल्लो दशक महिला फुटबलले निरन्तर अन्तर्राष्ट्रिय प्रतियोगिता खेल्दा सावित्रा चर्चित खेलाडीको रुपमा रहेकी छन् । पछिल्लो एक दशकमा नेपाल दुई पटक साफ च्याम्पियनसिपमा उपविजेता हुँदा सावित्रा टिममा थिइन् । यस्तै नेपालले १३औं साफमा रजत जित्दा पनि उनी ६मको मुख्य सदस्य थिइन् ।
सावित्राले भारतमा भएको हिरो महिला लिग दुई पटक जितेकी छिन् । लमजुङ जिल्लाको सिमपानीमा जन्मिएकी नेपाली फुटबल क्षेत्रमा साम्बा उपनामले समेत परिचित साबित्राले नेपाली महिला टोलीका लागि हालसम्म ३८ गोल गरिसकेकी छिन्। सावित्रा भण्डारी हाल नेपाली महिला फुटबल टोलीको सर्वाधिक उच्च गोलकर्ता हुन्।
उनले अनु लामाको ३५ अन्तर्राष्ट्रिय गोलको किर्तिमान भङ्ग गर्दै यो सफलता हात पारेकी थिइन । साथै साबित्रा कुनै पनि एउटा अन्तर्राष्ट्रिय प्रतियोगितामा सर्वाधिक गोल गर्ने नेपाली खेलाडी हुन्। यसो त साबित्रा नेपाली राष्ट्रिय महिला टोलीमा आउनु भन्दा पहिले भलिबल खेलमा आबद्ध रहेकी थिइन् ।
उनी एथलेटिक्स खेलमा पनि उत्तिकै सक्रिय अनि सफल रहेकी थिइन । साबित्रा भण्डारी एपिएफ क्लबका लागि १६ वर्षकै उमेरमा अनुबन्धित भएकी थिइन्। उनी वर्तमान समयमा एपीएफका प्रमुख अग्रपङ्क्तिकी खेलाडी समेत हुन्। उनकै उच्च र उत्कृष्ट प्रदर्शनकै कारणले एपीएफ क्लबले अनेक घरेलु महिला उपाधिहरू जित्न सफल भएको छ।
