२१ असार, एजेन्सी ।
विश्वकै सर्वाधिक प्रयोगकर्ता भएको सामाजिक संजाल मध्येको एक फेसबुकको मातृ कम्पनी मेटाले इन्स्टाग्रामको एक एपका रूपमा थ्रेड्स एप सार्वजनिक गरेको छ । यो एप करिब १०० देशमा आईओएस र एन्ड्रोइडका लागि उपलब्ध भएको छ । एक सार्वजनिक भएसँगै केही घण्टामै यसले उच्च लोप्रियता हासिल गरेको छ ।
मेटा प्रमुख मार्क जुकरबर्गले सार्वजनिक गरेको थ्रेड्स एपले ट्विटरलाई उछिन्ने बताएका छन् । युरोपियन युनियनबाहिरका १०० मुलुकमा सार्वजनिक थ्रेड्स एपमा ५०० अक्षरसम्म पोस्ट गर्न सकिन्छ । यस्तै, यसमा लिंक, फोटो र पाँच मिनेटसम्मको भिडियो पनि पोस्ट गर्न सकिन्छ । थ्रेड्स एपले लञ्च भएको पहिलो सात घण्टामा एक करोड प्रयोगकर्ताले साइन अप गरेको जुकरबर्गले भनेको बीबीसीले उल्लेख गरेको छ।
जुकरबर्गले थ्रेड्सलाई मैत्रीपूर्ण बनाउने र यो नै यसको सफलताको चाबी बन्ने बताएका थिए । ट्विटरका प्रमुख एलन मस्कले “दुःख लुकाएर इन्स्टाग्रामको झुटो खुसीमा लिप्त हुनुभन्दा ट्विटरमा अपरिचितले आक्रमण गरेकै पनि जाती भएको” भन्दै प्रतिक्रिया दिएका छन् । के यो एप ट्विटरभन्दा ठुलो हुनेछ ? भनेर सोधिएको प्रश्नमा जुकरबर्गले केही समय लागे पनि यो एक अर्ब मानिसले कुराकानी गर्ने एप हुनुपर्ने बताएका छन् ।
इन्स्टाग्रामकै अकाउन्टबाट साइन अप गर्न मिल्ने थ्रेड्समा त्यहाँका एक अर्ब बढी प्रयोगकर्ता आउनुपर्ने जुकरबर्गको भनाइ छ। यसका प्रतिद्वन्द्वीले थ्रेड्सले व्यक्तिगत जानकारी, स्वास्थ्यसम्बन्धी, आर्थिक र ब्राउजिङको डाटाको प्रयोगलाई लिएर आलोचना गरेका छन् । थ्रेड्समा आगामी दिनमा फिचर थप्दै जाने कम्पनीले जनाएको छ ।
छुट्टै एपका रूपमा उपलब्ध थ्रेड्समा इन्स्टाग्रामकै अकाउन्टबाट लगइन गर्न सकिन्छ । इन्स्टाग्रामकै फोटो राख्न वा इस्टाग्राममा भएका फलोअर्सलाई एकैपटक फलो गर्न सकिन्छ । यो एपलाई ट्विटरको प्रतिद्वन्द्वीका रूपमा हेरिएको छ ।
कम्पनीले यसलाई अरू मास्टडन, ब्लुस्कीलगायत सोसल मिडियाको प्रतिद्वन्द्वी समेत भनेको छ । ट्विटरका मालिक एलन मस्कले प्लेटफर्ममा विभिन्न समस्याको सामना गरिरहेका बेला मेटाले सार्वजनिक गरेको थ्रेड्सले पहिलो दिनमै पाएको सफलताले ट्विटरलाई थप चुनौती थपिने अनुमान गरिएको छ ।