Nepal Times
Nepal Times
3
Shares

सभामुखलाई राजीनामा गराएर गठबन्धनले कोशीमा सरकार बनाउँने

सभामुखलाई राजीनामा गराएर गठबन्धनले कोशीमा सरकार बनाउँने

१३ साउन, विराटनगर ।
कोशी प्रदेशका दुई वा दुईभन्दा धेरै दलको सहभागितमा नयाँ सरकार निर्माणका लागि फेरि आह्वान भएको छ । सर्वोच्च अदालतको बिहीबारको आदेशअनुसार असार २१ मा मुख्यमन्त्री बनेका उद्धव थापाको नियुक्ति बदर भएसँगै प्रदेश प्रमुख परशुराम खापुङले नयाँ सरकारका लागि आह्वान गरेका हुन्।

अब आउँदो मंगलबार अपरान्ह ५ बजेभित्र दलहरुले आफ्नो दाबी पेस गर्नु पर्ने छ । शुक्रबार कोशी प्रदेश एमाले संसदिय दलका नेता हिक्मत कार्कीले नेपाली काँग्रेससंग मिलेर आफूहरु सरकार बनाउँन तयार रहेको बताएका थिए ।

तर सत्तारुढ गठबन्धनले भने विगतकै सरकारलाई निरन्तरता दिने गरि प्रयास बढाएका छन् । यसका लागि कांग्रेस र माओवादी केन्द्र कोशीका सभामुख बाबुराम गौतमलाई राजीनामा गराएर भए पनि निकास खोज्न सहमति नजिक पुगेका छन् ।

प्रधानमन्त्री निवास बालुवाटारमा शनिबार बिहान दुई दलका नेताबीच छलफल भएको थियो । ‘कोशीका सभामुख गौतमलाई राजीनामा गर्न लगाएर नयाँ सरकार बनाउनु नै उत्तम विकल्प हुनेमा दुई दल सहमति नजिक पुगेका छन् ।

सभामुखले राजीनामा गरेर सरकार बनाउने कुरामा छलफल भएको छ । राजीनामा गराएर नै ४७ पु¥याउनु पर्छ भन्ने भएको छ,’ गठबन्धनका एक नेताले जानकारी दिए । सभामुखलाई राजीनामा गराएपछि मुख्यमन्त्री कसलाई बनाउने विषयमा बारेमा भने छलफलले निष्कर्ष निकाल्न सकेन ।

कांग्रेसका उद्धव थापालाई नै मुख्यमन्त्री बनाउने कि नयाँ व्यक्ति अघि सार्ने कुरामा सहमति बन्न सकेको छैन । ‘उद्धव थापालाई नै बनाउने कि अर्को व्यक्ति बनाउने टुंगो लाग्न सकेन,’ ति नेताले भने । मुख्यमन्त्रीभन्दा पनि छलफलमा संख्याको बारेमा कुरा भएको बताइएको छ ।

मुख्यमन्त्रीको सन्दर्भमा पुन छलफल गर्ने सहमति बनेको छ । साथै, बैठकमा राप्रपासँग पनि कोशी सरकारको बारेमा छलफल गर्ने कुरा भएको छ । थप छलफलका लागि आज पुनः वा भोलि बैठक बस्ने नेताहरूबीच सहमति बनेको छ । आज भोलि नै राप्रपासँग पनि छलफल गरिने भएको छ ।

प्रधानमन्त्री पुष्पकमल दाहाल ‘प्रचण्ड’ले बोलाएको बैठकमा कांग्रेस सभापति शेरबहादुर देउवा, उप सभापति पूर्णबहादुुर खड्का, महामन्त्री विश्वप्रकाश शर्मा, नेता कृष्णप्रसाद सिटौलालगायत सहभागी थिए । शुक्रबार विराटनगर पुगेर केन्द्रीय सदस्य डा. शेखर कोइरालाले पनि कोशी प्रदेशमा फेरि उद्धव थापाको नेतृत्वमा सरकार गठन हुने बताएका थिए ।

जबकी यसअघि थापा मुख्यमन्त्रीमा नियुक्त हुँदा शेखरले समामुखको हस्ताक्षर असंवैधानिक भन्दै आपत्ति जनाएका थिए । यसबारे पनि बोल्दै उनले विगतमा आफूले सभामुखले सरकार निर्माणमा हस्ताक्षर गर्नु गलत हो भन्ने कुरा अहिले पुष्टि भएको चर्चा गर्दै कांग्रेस लोकतन्त्रवादी पार्टी भएकाले अन्य राजनीतिक दललाई यससम्बन्धी पाठ सिकाउने धारणा राखे ।

गठबन्धन दलहरु सभामुखलाई राजीनामा गराउन सहमति नजिक पुगेका बेला कोइरालाको यस्तो बयान आएको हो । सरकार गठनका लागि ९३ सदस्यीय कोशी प्रदेशसभामा ४७ सांसदको समर्थन आवश्यक हुन्छ तर गठबन्धनमा कांग्रेसका २९, माओवादीका सभामुखबाहेक १२, एकीकृत समाजवादीका ४ र जनता समाजवादी पार्टीका १ गरी ४६, एमालेका ४० र राप्रपाका ६ सांसद छन ।

अहिलेको राजनीतिक समीकरणमा कसैको सरकार गठन हुने अवस्था देखिँदैन । यस्तो अवस्थामा राप्रपालाई विश्वासमा लिन कांग्रेस–माओवादीको प्रयास जारी रहेको छ । गठबन्धनलाई बहुमत संख्या ४७ पु¥याउन सभामुखलाई राजीनामा गराएर मात्रै सम्भव छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.