१४ साउन, एजेन्सी ।
भारतले दुई साता अघि प्रक्षेपण गरेको चन्द्र यान ३ आफ्नो गन्तब्य नजिक पुगेको छ । जुलाई ३१ अर्थात् सोमबार भारतीय चन्द्रयान पृथ्वीको कक्षको परिक्रमा पूरा गरेर चन्द्रमाको गन्तव्यतिर अगाडि बढ्ने भारतीय अन्तरिक्ष अनुसन्धान संगठन इसरोले बताएको छ ।
भारतले यसै महिनाको जुलाई १४ मा ऐतिहासिक चन्द्र अभियानअन्तर्गत चन्द्रयान– ३ अन्तरिक्षयानलाई शक्तिशाली रकेटबाट अन्तरिक्षमा पठाएको थियो । पछिल्लो पटक फेरि सातवटा भूउपग्रह आफ्नै रकेटमार्फत अन्तरिक्षमा पठाउन भारत सफल भएको छ । इसरोका अनुसार आन्ध्र प्रदेशस्थित श्रीहरिकोटा अन्तरिक्ष केन्द्रबाट सिंगापुरका सातवटा भूउपग्रह आइतबार बिहान साढे ६ बजे रकेटमार्फत् अन्तरिक्षमा पठाइएको हो ।
४४ दशमलव ४ मिटर लामो पीएसएलभी–सी५६ रकेटबाट सातवटा भूउपग्रह लन्च गरिएको हो । जसमध्ये ३६० केजीको डीएस–एसएआर भूउपग्रहलाई सबैभन्दा महत्त्वपूर्ण मानिएको छ । डीएस–एसएआर स्याटेलाइट सिंगापुरको रक्षा विज्ञान एवं प्राविधिक एजेन्सी र सिंगापुरकै एसटी इन्जिनियरिङले विकास गरेको भूउपग्रह हो । यस भूउपग्रह हरेक मौसममा दिनरात हाई रिजोलुसन तस्वीर खिच्न सक्षम छ ।
इसरोका अनुसार रकेटले उडेको २३ मिनेटमै यो भूउपग्रहलाई पृथ्वीको कक्षमा छाडेको थियो । त्यसपछि बाँकी ६ वटा स्याटेलाइटलाई पनि पृथ्वीको कक्षमा तैनाथ गरियो । भारतीय रकेट पीएसएलभीको यो ५८औँ सफल प्रक्षेपण हो । भारतीय रकेट विश्वसनीय भएकाले सिंगापुरले यही रकेटबाट आफ्नो भूउपग्रह अन्तरिक्षमा पठाउन छनोट गरेको बताएको छ ।
अब भारतीय अन्तरिक्ष अनुसन्धान संगठन इसरोले PSLV–C56 रकेटबाट चौथो चरणको प्रयोग गरेर विशेष प्रयोग गर्ने बताएको छ । यो नयाँ मिसन यस वर्ष अप्रिलमा लन्च गरिएको PSLV–C56 Telos–2 मिसनको विस्तृत रुप हुने भारतीय संचारमाध्यामहरुले उल्लेख गरेका छन् । आजको मिसनमा वैज्ञानिकहरूले PSLV रकेटको चौथो चरणलाई तल्लो कक्षमा राख्नेछन्।
इसरोले एक विज्ञप्ति जारी गर्दै भनेको छ कि सिंगापुरका सबै उपग्रहहरूलाई ५३६ किलोमिटरको उचाइमा तोकिएको कक्षमा राखेपछि रकेटको माथिल्लो चरण तल्लो कक्षमा राखिनेछ। यसबाट ३०० किलोमिटरको उचाइमा यसको सुरक्षा सुनिश्चित गर्न सकिनेछ । उनका अनुशार रकेटलाई तल्लो कक्षमा ल्याउनुको उद्धेश्य भनेको चाँही अन्तरिक्षमा फोहोर कम गर्नु हो ।
