१९ साउन,काठमाण्डौ ।
स्थानीय तहलाई जनताको घरदैलोको सिंहदरबारका रुपमा लिइन्छ । हिजोका दिनमा जिल्ला सदरमुकाम र राजधानी धाउनु पर्ने स्थानीयको बाध्यता अहिले धेरैहदसम्म कम भएको छ । तर केही स्थानीय तहको मनमौजी कार्यनीतिले भने स्थानीय तहकै बदनाम भईरहेको छ ।
अहिले बझाङको बुङ्गल नगरपालिकाबाट यस्तै घटना बाहिरिएको छ । नगरपालिकामा दिउसो २ बजेको समयमा कुनै पनि जनप्रतिनिध र कर्मचारी कार्यालयमा भेटिएका छैनन् ।
जनतालाई सेवा प्रवाह गर्नुपर्ने समयमा जनप्रतिनिधि र कर्मचारी कार्यालयमा नभएपछि काम विशेषले नगरपालिका पुगेका स्थानीयले भिडियो खिचेर सार्वजनिक गरिदिएपछि तिनै स्थानीय नगरपालिकाका कर्मचारीबाट कुटिनु परेको छ ।
नगरपालिकाका सूचना शाखा प्रमुख रमेश कार्कीले भिडियो खिच्ने स्थानीय रामचन्द्र जोशीलाई लछारपछार गर्दै मुक्का हिर्काएका छन् । रामचन्द्रले बुधबार दिउँसो कार्यालय समयमा समेत नगरपालिकामा कोही कर्मचारी नभएको भिडियो खिचेर सामाजिक सञ्जालमा राखेका थिए ।
सोही भिडियो किन राखेको भन्दै कार्कीले आफूलाई आक्रमण गरेको जोशीले बताएका छन् । कार्कीको हातपातले आफ्नो छाती र औँलामा चोट लागेको उनले जानकारी दिएका छन् । जोशीमाथि आक्रमण भएको भिडियो अहिले सामाजिक सञ्जालमा भाइरल भएको छ ।
राजनीतिक पहुँचकै भरमा कार्की नगरपालिकाको सूचना तथा प्रविधि शाखाको प्रमुखमा नियुक्त भएको जोशीको आरोप छ । बुधबार रामचन्द्रले खिचेको कार्यकालको भिडियोमा कोही पनि कर्मचारी र जनप्रतिनिधि कार्यालयमा देखिँदैनन् । कार्यालय समयमै एक जना पनि कर्मचारी नभेटेपछि नगरपालिकाको सेवा प्रवाह र जनप्रतिनिधिको भूमिकामै प्रश्न उठेको छ ।
