२३ साउन, एजेन्सी ।
साउदी अरबमा भएको युक्रेन शान्ति सम्मेलनको चीनले स्वागत गरेको छ । उता रुसले यसलाई असफलको संज्ञा दिइरहेको छ। युक्रेनबारे दुई देशबीचको यस्तो अभिव्यक्तिले आपसी सम्बन्धमा दुरी बढेको संकेत दिएको छ । केही दिनअघि चीनले रुसमा आफ्ना ५ जना नागरिकलाई प्रवेश निषेध गरेकोमा पुटिनका अधिकारीहरुको आलोचना गरेको थियो ।
यसका लागि चीनले प्रयोग गरेका शब्दहरू प्रायः बेइजिङले पश्चिमी देशहरूविरुद्ध प्रयोग गर्ने गरेको छ। यस्तो अवस्थामा चीन र रुसमा पछिल्ला केही दिनदेखि सबै कुरा ठीक नहोला भन्ने डर छ । चिनियाँ विदेश मन्त्रालयले साउदी अरेबियाको जेद्दाहमा भएको दुईदिने बैठकले रुस–युक्रेन विवादको शान्तिपूर्ण समाधान खोज्न अन्तर्राष्ट्रिय सहमतिलाई बलियो बनाउन मद्दत गरेको बताएको छ।
युक्रेन, अमेरिका, युरोपेली देशहरू र ब्रिक्स समूहका देशहरू सहित १४० भन्दा बढी देशहरू संवादमा सहभागी थिए। रुस बैठकमा सहभागी नभए पनि बाहिरबाट अवलोकन गरिरहेको बताएको छ । रुसी सरकारी सञ्चारमाध्यमका अनुसार क्रेमलिनका अधिकारीहरूले रुसलाई वार्ताका लागि निमन्त्रणा नगरेको तर निगरानी गरिरहेको बताएका छन् ।
रुसका अनुशार यस शान्ति सम्मेलनबाट आगामी दिनमा थप छलफल गर्ने सहमति बाहेक केही भएको छैन् । उता युक्रेनले भने यस बैठकमा चीनको उपस्थितिलाई कूटनीतिक विजयको रूपमा स्वीकार गरेको छ। बेइजिङले गएको जुनमा डेनमार्कमा भएको अन्तिम चरणको वार्तामा आफूलाई टाढा राखेको थियो । तर साउदी अरेबियाको निमन्त्रणालाई अस्वीकार गर्न सकेन ।
हालैका वर्षहरूमा चीन–साउदी अरेबिया सम्बन्धमा उल्लेखनीय प्रगति भएको छ। दशकौंदेखि शत्रुतामा रहेका इरान र साउदी अरबबीच पनि चीनले मित्रता कायम गरेको छ । जेद्दाहमा भएको युक्रेन शान्ति सम्मेलनमा चीनलाई प्रमुख स्थान दिइएको थियो।
साउदीका राष्ट्रिय सुरक्षा सल्लाहकार मुसाइद बिन मोहम्मद अल–आइबा आफ्ना अमेरिकी समकक्षी जेक सुलिभान र यूरेशियन मामिलाका लागि चिनियाँ विशेष प्रतिनिधि ली हुई बीचमा बसेका थिए । चीनको परराष्ट्र मन्त्रालयले एक लिखित विज्ञप्तिमा लीले युक्रेन संकटको राजनीतिक समाधानका लागि सबै पक्षहरूसँग व्यापक छलफल गरेको जनाएको छ।
