२९ साउन,काठमाण्डौ ।
सङ्घीय मामिला तथा सामान्य प्रशासन मन्त्रालयकी नवनियुक्त मन्त्री अनितादेवी साहले पद तथा गोपनीयताको शपथ लिएकी छिन् । राष्ट्रपति कार्यालय शीतल निवासमा आज आयोजित समारोहमा राष्ट्रपति रामचन्द्र पौडेलले उनलाई शपथ दिलाएका हुन् ।
नेपालको संविधानबमोजिम नवनियुक्त मन्त्रीले राष्ट्रपतिबाट शपथ लिने संवैधानिक व्यवस्था छ । मन्त्री अनितादेवी जनमत पार्टीको सांसद हुन् । समारोहमा उपराष्ट्रपति रामसहाय प्रसाद यादव, प्रधानमन्त्री पुष्पकमल दाहाल प्रचण्ड, सभामुख देवराज घिमिरे, राष्ट्रियसभाका अध्यक्ष गणेशप्रसाद तिमिल्सिना, जनमत पार्टीका अध्यक्ष सिके राउत, संवैधानिक निकायका प्रमुख, मुख्यसचिव, सुरक्षा निकायका प्रमुखलगायतको उपस्थिति थियो ।
यसअघि, नेकपा (माओवादी केन्द्र)का तर्फबाट सामान्य प्रशासनमन्त्री रहेका अमनलाल मोदीलाई फिर्ता बोलाइएको थियो । मन्त्रालय भागबन्डामा असन्तुष्टि जनाउँदै करिब ४ महिनाअघि सरकारबाट बाहिरिएको जनमत पार्टी पुनः सरकारमा सहभागी भएको हो । पार्टीले मन्त्रीका लागि समानुपातिक सांसद अनितादेवी साहको नाम सिफारिस गरेको थियो ।
जनमतले एक साताअघि प्रधानमन्त्री दाहाललाई साहको नाम सिफारिस गरेको थियो । ४१ वर्षकी साहले जनसंख्या विषयमा स्नातक गरेकी छन् । यसअघि उनी २०७९ वैशाख ३० गते सम्पन्न स्थानीय तहको चुनावमा जनकपुर उपमहानगरपालिकाको प्रमुख पदकी उम्मेदवार बनेकी थिइन । तर, निकै कम मात्रै मत उनले पाइन । जनमत पार्टीले ९ वर्षअघि सुरु गरेको किसानसँग सम्बन्धित आन्दोलनमा उनी सहभागी हुन्थिन् ।
त्यही बेलादेखि राजनीतिप्रति उनको रुचि बढ्न थाल्यो । अन्ततः जनमत पार्टीको जनकपुर इन्चार्ज भएर झण्डै तीन महिना काम पनि गरिन् । सांसद बनेको पहिलो चरणमै उनले मन्त्री बन्ने अवसर पाएकी छन् । उनका पति इन्जिनियर सञ्जयकुमार साह वैदेशिक रोजगारीको सिलसिलामा कतारमा थिए ।
डा. सिके राउतले स्वतन्त्र मधेश गठबन्धनको अभियान चलाउँदा प्रभावित भएर २०१४ मै उनी पनि त्यही अभियानमा लागेका हुन् । हाल अनिता जनमत पार्टीको केन्द्रीय सचिवसँगै संसदीय दलको प्रमुख सचेतकसमेतको जिम्मेवारीमा छिन् । धनुषाको औरही गाउँपालिका–६ चक्कर टोलका इन्जिनियर बुबा एमुना साह र आमा स्वर्गीय दिव्यकला देवीका चार छोरी मध्येकी साहिली हुन् अनिता ।
बुबा जागिरे हुँदा सँगै बसेर काठमाडौंको थापाथलीस्थित गुजेश्वरी माविबाट कक्षा ८ सम्म पढेकी उनले गाउँकै शंकर जनता मावि चक्करबाट एसएलसी पास गरेकी छन् । जनकपुर नाइट कलेजबाट अनिताले प्लस टु र त्यसपछि स्नातक गरेकी छन् ।
ओरेक नेपालको सदस्यदेखि सल्लाहकारको भूमिकासम्म निर्वाह गरेकी अनितासँग जिल्ला प्रहरी कार्यालय महिला तथा बालबालिका सेलको सदस्यको रुपमा काम गरेको अनुभव छ । यसअघि चैत १७ गते जनमतबाट खानेपानी मन्त्री बनेका अब्दुल खानले राजीनामा दिएपछि जनमत सरकारमा थिएन ।
नवनियुक्त मन्त्री साहमाथि संघीयताको पूर्ण कार्यान्वयन,लामो समयदेखि थन्किएको निजामति सेवा ऐन पारित गराउनेदेखि कर्मचारीको सरुवा तथा पदस्थापन लगायतका चुनौती रहेका छन् ।
