११ भदौ, काठमाण्डौ ।
पूर्व प्रधानमन्त्री तथा नेपाल समाजवादीका अध्यक्ष डा. बाबुराम भट्टराईले नेपाल भारत–चीन–अमेरिकाको त्रिपक्षीय द्वन्द्वको भू–सामरिक भुमरीमा पर्दै गएको विश्लेषण गरेका छन्। उनले नेपाल त्रिपक्षीय द्वन्द्वको भू–सामरिक भुमरीमा परेको बेलामा संघीय लोकतान्त्रिक गणतन्त्र पक्षधर शक्तिहरूवीच एकताबद्ध हुनुपर्ने बेलामा सत्ता केन्द्रित भएको आरोप लगाएका छन् ।
उनले आज ट्विटरमा लेखेका छन् ‘देश आन्तरिक रूपमा पूँजी र श्रम दुवै पलायन भइरहेको गम्भीर संरचनात्मक समस्यामा र बाह्य रूपमा बढ्दो भारत–चीन–अमेरिकाको त्रिपक्षीय द्वन्द्वको भू–सामरिक भुमरीमा पर्दै गएको बेला भर्खरै जग बस्दै गरेको संघीय लोकतान्त्रिक गणतन्त्र पक्षधर शक्तिहरूवीच गम्भीर विमर्श, सहकार्य र दरो राष्ट्रिय एकता कायम गरेर अघि बढ्नुपर्ने हो’।
चरम सत्तालोलुप, भ्रष्ट र अदूरदर्शी व्यक्ति÷शक्तिहरूको सत्ताको लुछाचुँडीले संरचनात्मक समस्या हल गर्नेभन्दा समस्या झन् गिजोलिएर देश र संघीय लोकतान्त्रिक गणतान्त्रिक प्रणाली नै गम्भीर दुर्घटनातिर उन्मुख हुँदै गएको उनको बुझाइ छ।
संघ र कोशी प्रदेश लगायतमा भइरहेका निर्लज्ज र अलोकतान्त्रिक सत्ता लुछाचुँडी, आआफ्नै ढंगले उद्घाटित भइरहेका ठूला भ्रष्टाचार प्रकरणहरूको प्रवृत्ति, व्यक्ति÷दल÷गुटका आ–आफ्नै बाह्य शक्तिकेन्द्रहरूको चाकडी÷दलाली त्यसका भद्दा नमूना भएको उल्लेख गरेका छन्।
उनले भनेका छन्, ‘यो गम्भीर स्थितिलाई वेलैमा वस्तुनिष्ठ आँकलन गरेर सबै देशभक्त, लोकतान्त्रिक र प्रगतिशील शक्तिहरूले देश र जनताको हितमा आवश्यक पहल नगर्ने हो भने भोलि धेरै ढिलो हुनसक्छ ! रणबहादुर र जङ्गबहादुरहरू त आउँछन्, जान्छन् तर देश र जनतालाई धेरै ठूलो नोक्सान हुनसक्छ !’
बाबुरामले प्रदेश सभाको दुईतिहाई मतबाट प्रदेश १को नाम कोशी नामाकरण गरेपनि आफ्नो टिवटमा भने प्रदेश १ नै उल्लेख गरेका छन् । प्रदेश १ लेखेर पूर्वप्रधानमन्त्री बाबुरामले प्रदेशको नाम पहिचानको आधारमा राख्नु पर्ने आवाजलाई समर्थन रहेको जनाउ दिएका छन् ।
