Nepal Times
Nepal Times
3
Shares

अर्बपति टेरी ताइवानको राष्ट्रपति चुनावमा लड्ने

अर्बपति टेरी ताइवानको राष्ट्रपति चुनावमा लड्ने

११ भदौ, एजेन्सी ।
विश्वकै ठूलो प्रविधि उत्पादक एवं एप्पलको प्रमुख सप्लायर फक्सकनका संस्थापक अर्बपति टेरी गोउले ताइवानको राष्ट्रपतिको निर्वाचनमा प्रतिस्पर्धा गर्ने घोषणा गरेका छन् । ताइवानको सम्बन्ध ठिक गर्ने र अर्थतन्त्रलाई बलियो बनाउने प्रतिबद्धता व्यक्त गर्दै उनले स्वतन्त्र रूपमा उमेदवारी दिने घोषणा गरेका हुन् । सोमबार आयोजित पत्रकार सम्मेलनमा उनले भने, “मैले २०२४ को राष्ट्रपतीय चुनावमा सामेल हुने निर्णय गरेको छु ।”

उनले ताइवान दोस्रो युक्रेन बन्न लागेको भन्दै आफूले त्यसो हुन नदिने बताए । उनले भने, “मलाई चार वर्ष दिनुहोस्, म ताइवान स्ट्रेटमा ५० वर्षको शान्ति ल्याउनेछु । ताइवान स्ट्रेटमा पारस्परिक विश्वासको लागि सबैभन्दा गहिरो आधार निर्माण गर्नेछु…ताइवान युक्रेन बन्नु हुँदैन र म ताइवानलाई अर्को युक्रेन बन्न दिने छैन ।” ताइवानको प्रमुख प्रतिपक्ष पार्टी कुओमिन्ताङ (केएमटी)का तर्फबाट उमेदवारका रूपमा चयन नभएपछि उनले स्वतन्त्र उमेदवारी घोषणा गरेका हुन् ।

गोउले स्वतन्त्र उमेदवारका रूपमा योग्य हुन आउँदो नोभेम्बरसम्म दुई लाख ९० हजार हस्ताक्षर संकलन गर्नुपर्नेछ । गोउले ताइवानको सत्तारूढ डेमोक्रेटिक प्रोग्रेसिभ पार्टी (डीपीपी) भ्रष्ट र आक्रामक भएको आरोप लगाएका छन् । यसले पछिल्ला सात वर्षमा सम्बन्ध बिगार्दै ताइवानलाई युद्धतर्फ धकेलेको उनको भनाइ छ ।

पछिल्लो समय ताइवानलाई लिएर चीन र अमेरिका आमुने सामुने आएका छन् । ताइवानी राष्ट्रपतिले अमेरिकासँगको सहयोगमा चीनसँग निहुँ खोजेको एक पक्षको आरोप छ । यता चीन भने ताइवान चीनकै हिस्सा रहेको भन्दै कुनै पनि समय शान्तिपूर्ण रुपमा चीनमा विलय गराउने बताउँदै आएको छ ।

तर पछिल्लो समय ताइवानी नेतृत्व चीनसँग युद्ध लड्नु परेपनि त्यसका लागि आफूलाई तयारी अवस्थामा राख्न हतियार खरिददेखि आवश्यक हतियारको व्यवस्थापनमा जुटेको छ। स्वतन्त्र विश्लेषकहरुले भने अमेरिकाले ताइवानको स्वतन्त्रता र स्वाधिनकताको रक्षाका लागि भन्दै चीनविरुद्ध उकासेर ताइवानमा हतियारको व्यापार गरिरहेको टिप्पणी गर्ने गरेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.