१२ भदौ , एजेन्सी ।
पाकिस्तानका पूर्वप्रधानमन्त्री इमरान खानको जेल सजाय उच्च अदालतले खारेज गरेको छ । मंगलबार इस्लामावाद उच्च अदालतले उनलाई सुनाइएको तीन वर्षको जेल सजाय खारेज गरेको हो । मुख्य न्यायाधीश आमेर फारुक र न्यायाधीश तारिक मेहमुदको संयुक्त इजलासले ट्रायल कोर्टले सुनाएको आदेश खारेज गरेको हो ।
ट्रायल कोर्टले पूर्वप्रधानमन्त्री खानलाई दोषी ठहर गर्दै तीन वर्ष कैद सजाय सुनाएको थियो । उक्त आदेशमा खानलाई पाँच वर्षसम्म चुनाव लड्न अयोग्य ठहराइएको थियो । तोशाखाना मामिलामा ट्रायल कोर्टले खानलाई ३ वर्षको सजाय सुनाएको थियो । उच्च अदालतले भने आज इमरानलाई जमानतमा रिहा गर्न आदेश दिएको हो । हाल इमरानलाई एट्टक जेलमा राखिएको छ ।
अगस्ट ५ मा इस्लामावादको ट्रायल कोर्टले पाकिस्तान तेहरिक इन्साफ पार्टीका नेतासमेत रहेका खानलाई भ्रष्टाचारको आरोपमा दोषी ठहर गरेको थियो । राज्यलाई प्रदान गरिएको उपहारको दुरुपयोग गरेकोमा खानलाई दोषी ठहर गर्दै ३ वर्षको सजाय सुनाइएको थियो। सो फैसलाका कारण खान ५ वर्षसम्म कुनै पनि निर्वाचनमा प्रतिस्पर्धा गर्न अयोग्य भएका थिए ।
उक्त आदेशविरुद्ध इमरानले उच्च अदालतमा पुनरावेदन गरेका थिए । पाकिस्तानमा अबको केही महिनामा आमनिर्वाचन हुँदै छ । पीटीआइले आजै खानलाई रिहा गर्न माग गरेको छ । पाकिस्तान मुस्लिम लिगले भने खानको सजाय स्थगित गर्न दिइएको आदेशप्रति असन्तुष्टि जनाएको छ। लिगका नेता एवम् पूर्व प्रधानमन्त्री शहबाज शरिफले खानको सजाय स्थगित मात्र भएको भन्दै उनको सजाय खारेज नभएको बताएका छन् ।
उनले न्याय प्रणाली र उच्च अदालतका न्यायाधीशमाथि नै प्रश्न उठाएका छन् । खान फेरि निर्वाचन लड्न सक्ने भन्दै लिगका नेताहरुले उनीमाथि अन्य मुद्दामा समेत छानबिन हुनुपर्ने बताइरहेका छन् । अगस्त १० मा राष्ट्रियसभा भंग गरिएसँगै ९० दिन भित्र निर्वाचन हुनुपर्ने हो । तर राजनीतिक अस्थिरताका कारण तय समयभित्रै निर्वाचन हुने नहुने बारे अन्यौलता छ । निर्वाचनका लागि हाल पाकिस्तानमा कामचलाउ प्रधानमन्त्रीले सरकार चलाइरहेका छन् ।
