१५ भदौ,काठमाण्डौ ।
सत्तारुढ गठबन्धनमा आवद्ध ४ दलीय समाजवादी मोर्चामा रहेको नेत्रविक्रम चन्द ‘विप्लव’ नेतृत्वको नेकपाले एमसीसी कार्यान्वयनविरुद्ध आन्दोलनको घोषणा गरेको छ । उसले पहिलो चरणको सङ्घर्षका कार्यक्रम सार्वजनिक गरेको छ । जसमा गोष्ठी र मार्चपास अभियान रहेका छन् ।
शुक्रबार बिहान बसेको सो पार्टीको स्थायी कमिटी बैठकले काठमाडौँको लप्सेफेदीबाट धादिड, नुवाकोट, मकवानपुर, नवलपरासी, रुपन्देही लगायतका जिल्लामा अन्तरक्रिया र गोष्ठी हुनेछन् । ती कार्यक्रम सकभर देशभक्तहरूको संयुक्त रूपमा आयोजना गरिने र यदि त्यसो नभए पनि नेकपाले एकल रूपमा गोष्ठी र अन्तरक्रियाहरु गर्ने नेता अनिल शर्माले बताए ।
यी कार्यक्रम भदौ १९ देखि २३ सम्म हुनेछन् । शर्माका अनुसार असोज १ गतेदेखि १५ गतेसम्म एमसीसीविरुद्ध मार्चपास अभियान चलाउने पनि बैठकले निर्णय गरेको छ । गोष्ठीको कार्यक्रम सकिएपछि असोज १ देखि १५ गतेसम्म एमसीसीविरुद्ध मार्चपास अभियान सुरु गर्ने शर्माले जानकारी दिए ।
त्यसमा सामना सांस्कृतिक परिवार र कलाकार माइला लामासहितको टोली पनि सहभागी हुनेछ । पहिलो चरणको कार्यक्रम सकिएपछि स्थायी कमिटी बैठक बसेर दोस्रो चरणको कार्यक्रम तय गर्ने सो पार्टीले जनाएको छ । ‘पहिलो चरणको कार्यक्रममा अहिले सहभागी छौँ ।
यो सकिएपछि आवश्यकअनुसार निर्णय हुन्छ’, नेता शर्माको भनाइ छ । यसैबीच विप्लवको समूह समेत सहभागि रहेको समाजवादी मोर्चा नेपालले आज पोखरामा सन्देश सभा गर्दैछ । प्रदेशस्तरीय सभाका क्रममा मोर्चाले शुक्रबार गण्डकी प्रदेशको राजधानी पोखरामा सन्देश सभा गर्न लागेको हो ।
पोखरा सभागृहमा हुने सभामा प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सम्बोधन गर्नेछन् । उनीसँगै मोर्चामा आबद्ध दलका शीर्षनेताले पनि सम्बोधन गर्ने कार्यक्रम तय भएको छ ।
सभामा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपाल, जनता समाजवादी पार्टीका अध्यक्ष उपेन्द्र यादव, नेपाल कम्युनिष्ट पार्टीका महासचिव नेत्रविक्रम चन्द ‘विप्लव’सहभागी माओवादी केन्द्रका सचिव एवं समाजवादी मोर्चाका गण्डकी प्रदेशका इन्चार्ज देवेन्द्र पौडेलले जानकारी दिए ।
प्रचण्डसहित माओवादीका केही नेताहरुले र नेकपा एसका नेताहरुले समेत एमसीसी कार्यान्वयनको चरणमा जाँदा पनि यसबारे उठेका कुराहरुबारे छलफल गर्नु पर्ने बताइरहेका छन् ।
झलनाथ खनालले भने सुरुवात देखिनै एसीसी खारेज नै हुनुपर्ने बताउदै आएका छन् । मोर्चाले बिहीबार सुर्खेतमा सन्देश सभा आयोजना गरेको थियो । जहाँ विप्लवले कम्युनिष्ट एकतामा जोड दिएका थिए भने प्रचण्डले एमाले विभाजनको अवस्थामा रहेको दावी गरेका थिए ।
