१५ भदौ ,एजेन्सी ।
रुसको लुना–२५ अन्तरिक्ष यान भारतको चन्द्रयानभन्दा पहिले चन्द्रमाको दक्षिणी ध्रुवमा पुग्न लागेको थियो । तर प्रि–ल्यान्डिङ अर्बिटमा जाँदा ग्राउन्ड स्टेशनसँगको सम्पर्क टुटेको थियो । लगत्तै अन्तरिक्षयानले नियन्त्रण गुमाएर चन्द्रमाको सतहमा दुर्घटनाग्रस्त भएको थियो । अब नासाले रुसको लुना २५ दुर्घटना भएको ठाउँ पत्ता लगाएको छ ।
नासाको लुनार रिकोनेसेन्स अर्बिटर (एलआरओ) अन्तरिक्ष यानले चन्द्रमामा नयाँ क्रेटर फेला पारेको छ। लुना–२५ अन्तरिक्षयान अगस्ट १९ मा दुर्घटनाग्रस्त भएको थियो। नासाले यो अन्तरिक्ष यान जहाँ खसेको थियो त्यहाँ ठूलो खाडल बनेको देखेको छ । नासाले भनेको छ, रुसी अन्तरिक्ष एजेन्सी रोजकोसमोसले अगस्ट २१ मा प्रभाव बिन्दुको स्थानको अनुमान गरेको थियो ।
रोजकोसमोसको टोली र मिसन अपरेशन टोलीले २२ अगस्टसम्म अन्तरिक्ष यानमा आदेशहरू पठाउन सक्षम थियो । नासाले थप भनेको छ, यी तस्विर खिच्ने प्रक्रिया २४ अगस्टको दिउँसो २.१५ बजे सुरु भएको थियो र करिब ४ घण्टामा पूरा भएको थियो । टोलीले टक्कर अघि र पछि खिचिएका तस्विरहरूको तुलना गरेको थियो जहाँ एउटा नयाँ खाडल फेला पारेको थियो ।
एलआरओले पहिलो पटक जुन २०२२ मा यस क्षेत्रको फोटो खिचेको थियो । किनभने यो नयाँ खाडल लुना २५ को अनुमानित टक्करको बिन्दुको नजिक छ । नयाँ खाडलको व्यास १० मिटर छ। रुसले अगस्ट १० मा लुना–२५ अन्तरिक्ष यान प्रक्षेपण गरेको थियो । रुसको लक्ष्य उसको अन्तरिक्ष यान अगस्ट २१ मा चन्द्रमाको दक्षिणी ध्रुवमा अवतरण गर्ने थियो।
रुसी अन्तरिक्ष एजेन्सीले थ्रस्टर अत्यधिक रूपमा चलिरहेको थियो, जसका कारण यो सीधा सतहतिर ठोक्किएको थियो । क्रेमलिनले देशको अन्तरिक्ष कार्यक्रम जारी रहने बताएको छ। रुसको लुना–२५ सन् १९७६ पछि पहिलो अन्तरिक्ष यान थियो, जुन चन्द्रमामा पठाउन प्रक्षेपण गरिएको थियो। अब रुसले क्रमश लुना २६, २७ र २८ सम्मको तयारी गरिरहेको छ ।
