३१ भदौ , एजेन्सी ।
किङ खान उपनाम पाएका बलिउडका बादशाह शाहरुख खान अभिनित ‘जवान’ले घरेलु बक्स अफिसमा आफ्नो शानदार प्रर्दशन कायम राखेको छ । जवान हरेक दिन रेकर्ड बनाउने गरी आक्रमक कारोबार गरिरहेको छ । पहिलो हप्ता बक्स अफिसमा एकछत्र राज गरेको चलचित्रको दोस्रो हप्ताको अन्त्यमा अझै क्रेज घटेको छैन ।
स्याकनिल्कको रिपोर्ट अनुसार दोस्रो शनिबार चलचित्रले ३१.५० करोड भारु आम्दानी गरेको छ । योसँगै चलचित्रले घरेलु बक्स अफिसमा खुद ४४०.४८ करोड भारु कमाइसकेको छ । एट्ली निर्देशित चलचित्रले आइतबार सार्वजसनक विदा भएकाले चाँडै ५ सय करोड क्लबमा प्रवेश गर्ने देखिएको छ । जवानले शनिबार हिन्दी बजारमा ३७.२९ प्रतिशत अकुपेन्सी पाएको थियो ।
धेरै दर्शक रात्रिकालीन शोमा चलचित्र हेर्न गएका थिए । यस्तै आक्रमक ब्यापार आज हुने विश्लेषण गरिएको छ । तमिल र तेलुगुमा यो दर क्रमशः ३.५१ र २९.४० प्रतिशत रहेको थियो । चलचित्र निर्माता कम्पनी रेड चिलिज इन्टरटेनमेन्टका अनुसार जवानले विश्वभरबाट ७३५.०२ करोड भारु कमाएको छ । आगामी हप्ता चलचित्रले १ हजार करोडको आँकडा पार गर्ने कम्पनीको अपेक्षा रहेको छ ।
यदि घरेलु बजारमा जवानले ५ सय करोड भारु आम्दानी ग¥यो भने यो वर्ष यो कोशेढुंगा पार पर्ने यो तेस्रो चलचित्र हुनेछ । बलिउडमा अहिलेसम्म यस्तो कहिले पनि भएको थिएन । शाहरुखकै पठानले ५४३.०५ करोड भारु कमाएको थियो भने त्यसपछि रिलिज भएको सनी देओलको गदर–२ ले ५१७.२८ कमाएको थियो ।
यी तीन चलचित्र बाहेक कुनै पनि हिन्दी चलचित्रले आजसम्म घरेलु बक्स अफिसमा ४ सय करोड भारुको कोशेढुंगा पार गरेको थिएन । यसअघि दंगलले ३८७.३८ करोड भारु कमाएको थियो । भारतीय सञ्चारमाध्यमका अनुसार जवानले घरेलु बक्स अफिसमा पहिलो दिन ७५ करोड भारूको ओपनिङ गरेको थियो ।
फिल्मले हिन्दी संस्करणमा मात्रै ६५ करोड भारू कमाएको हो। फिल्मले पहिलो दिन सबैभन्दा बढी कमाइ गर्ने हिन्दी फिल्मको रेकर्ड राखेको छ शाहरुखले यसअघि कहिल्यै नदेखिएजस्तो आजाद र विक्रम राठौरको वीर चरित्रमा अभिनय गरेका छन् ।
फिल्ममा शाहरूखसँगै नयनतारा, विजय सेतुपथी, दीपिका पादुकोणलगायत कलाकारको अभिनय छ। फिल्ममा शाहरुख पत्नी गौरी खानको लगानी छ। फिल्ममा शाहरूख डबल रोलमा देखिएका छन् भने नयनतारा पुलिस अफिसरको भूमिकामा छिन्। जिके विष्णुले छायांकन गरेको फिल्मलाई रूबेनले सम्पादन गरेका छन्।