६ असोज, काठमाण्डौ ।
नेपाल क्रिकेट संघ (क्यान)को अध्यक्षमा चतुरबहादुर चन्द निर्विरोध निर्वाचित भएका छन् । उनीसंगै उपाध्यक्षमा रोशनकुमार सिंह र कोषाध्यक्षमा पदमबहादुर खड्का पनि निर्विरोध चयन भएका छन् । निर्वाचनका लागि उमेदवारी दर्ता समयसम्म उनीहरुबाहेक अरू कसैको उमेदवारी दर्ता नभएपछि उनीहरू निर्विरोध भएका हुन् । अध्यक्षमा चन्दको यो दोस्रो कार्यकाल हो ।
आफू निर्विरोध अध्यक्षमा दोस्रो पटक निर्वाचित भएपछि चतुरबहादुर चन्दले खुसी हुनुपर्ने कुनै कारण नभएको प्रतिक्रिया दिएका छन् । आज बिहान अध्यक्ष पदमा निर्विरोध निर्वाचित भएपछि चुनौती तथा पदीय दायित्व थपिएकाले यसमा खुसी हुुनुभन्दा पनि ती काम गर्न सक्नु ठूलो कुरा हुने उनले बताएका हुन् ।
उनले भने, ‘अझै च्यालेन्जहरू थपिएको छ । खुसी हुनुपर्ने कुनै कारण छैन, पदीय जिम्मेवारी थपिएको छ।’ यसअघि चन्दको विरुद्धमा बर्दिया क्रिकेट संघका विनयराज भण्डारी उठ्ने घोषणा गरेका थिए । मनोनयन समयमा उनले प्रस्तावक र समर्थक दुबै नपाएपछि उनी पछि हटेका हुन् । त्यसैको कारण चन्द सर्वसम्मत रुपमा निर्वाचित भएका हुन् ।
चन्द, खड्का र सिंह एउटै प्यानलबाट लडेका थिए । खड्का यसअघि क्यानका केन्द्रिय सदस्य र वर्तमान कर्णाली प्रदेशका अध्यक्ष समेत हुन् । महिला सदस्य जयन्ती भट्ट पनि निर्विरोध निर्वाचित भएकी छिन् । सचिव पदमा भने चन्द प्यानलबाट पारस खड्का र पूर्वकन्द्रिय सदस्य प्रशान्त विक्रम मल्ल लड्ने भएका छन् ।
दुबैले उम्मेद्धवारी दर्ता गरेका छन् । क्यानको चुनावमा कुल ८५ मत छ । प्रमुख पद जित्न ४४ मत आवश्यक पर्दछ । अव प्रमुख पदमा सचिव र सदस्यमा मात्रै निर्वाचन हुँदै छ । क्यानका लागि १७ सदस्यीय कार्यसमितीका लागि आज निर्वाचन हुँदै छ । १९ सदस्यमध्ये २ जना भने राष्ट्रिय खेलकुद परिषद् राखेपले मनोनयन गर्नेछ ।
