१६ असोज, काठमाण्डौ ।
बझाङमा भूकम्पको ठूलै धक्का महसुस गरिएको छ । मंगलबार दिउँसो ३ बजेर ६ मिनेटमा बझाङको चैनपुर केन्द्रविन्दुआसपास बनाएर ६.३ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ । भूकम्पको धक्का सुदूरपश्चिमका सबै जिल्लामा महसुस गरिएको छ ।
बझाङ जिल्लाभरि विभिन्न ठाउँमा घरहरू चर्किएको जानकारी आए पनि क्षतिको यकिन विवरण भने आउन बाँकी छ । यसअघि मंगलबार दिउँसो २ बजेर ४० मिनेट जाँदा बझाङकै तलकोट केन्द्रविन्दु भएर ५.३ म्याग्निच्युडको भूकम्प गएको थियो । पटक–पटक परकम्प गइरहेको हुनाले अहिले स्थानीय बासिन्दा घरबाहिर खुला चौरमा बसिरहेका छन् ।
भूकम्पको धक्का सुदूरपश्चिम प्रदेशका तराईका जिल्लामा समेत महसुस भएको छ । धनगढीसम्म भूकम्पको धक्का महसुस भएको छ । त्यस्तै कर्णाली, लुम्बिनी, गण्डकी र वाग्मती प्रदेशका केही भागमा समेत धक्का महसुस भएको छ । भूकम्पका कारण बझाङमा केही घर भत्किएका छन् । भूकम्पले भौतिक संरचनामा ठूलो क्षति भएको छ ।
बझाङको तलकोट गाउँपालिकाकी उपाध्यक्ष पार्वती कुमारी भण्डारीले भौतिक संरचनामा ठूलो क्षति भएको बताएकी छन् । उनले भनेकी छन्, ‘मानवीय क्षतिको विवरण आइसकेको छैन । कतिपय वडा कार्यालय, विद्यालयका भवनहरु ध्वस्त भएको अवस्था छ ।’ भूकम्पले बाटोहरुमा पहिरो आएको उनको भनाइ छ ।
‘पहिरो आएर बाटो बन्द भएको छ । भूकम्पले कति क्षति भयो भन्ने पूर्णविवरण आउन बाँकी छ । बझाङमा गएको भूकम्पको धक्का नयाँ दिल्लीसम्म पुगेको छ । दिल्लीसहित त्यस वरपर भूकम्पको झड्का महसुस भएको भारतीय मिडियाहरुले जनाएका छन् ।
समाचारअनुसार भूकम्पको झड्काका कारण नयाँ दिल्लीमा धेरैबेर हल्लाएको थियो । भारतीय नेशनल सेन्टर फर सिस्मोलोजीले पनि नेपालमा ६.२ म्याग्निच्युडको भूकम्प गएको जनाएको छ । यता काठमाडौंमा पनि भूकम्पको धक्का महशुस भएको छ । आज दिउँसो ३ः७ बजेतिर कम्पन महशुस भएको हो । भूकम्पको केन्द्रबिन्दुबारे यकिन भएको छैन ।
