१९ असोज, एजेन्सी ।
रुसी राष्ट्रपति भ्लादिमिर पुटिनले पश्चिमी सैन्य र आर्थिक सहायता रोकिए युक्रेन ‘एक हप्ता’ भन्दा बढी नटिक्ने बताएका छन् । युरोपेली संघका एक अधिकारीले अमेरिकाले सहयता रोके त्यसलाई ईयूले परिपूर्ति गर्न नसक्ने चेतावनी दिएकै दिन पुटिले यस्तो टिप्पणी गरेका हुन् । वाशिंगटनमा बढ्दो राजनीतिक तनावले रूससँग लड्न कीभलाई आवश्यक महत्त्वपूर्ण सैन्य र मानवीय सहायता रोकिनसक्ने चिन्ता बढेको छ ।
अमेरिकी राष्ट्रपति जो बाइडेनले यसै साता युक्रेनका लागि दिँदै आएको सहायता टुट्न सक्ने चिन्ता व्यक्त गरेका थिए । “प्रत्येक महिना आइरहेको अर्बौंको सहयताका कारण युक्रेन उभिन सकेको छ,” बिहीबार मस्को आधारित थिंक ट्यांक भल्दाई डिस्कसन क्लबको बैठकमा बोल्दै पुटिनले भनेका छन्, “यदि यो रोकियो युक्रेन एक हप्तामा सकिनेछ ।
” पुटिनले यदि पश्चिमा मुलुकहरुले गोलीबारुद दिन छोडेमा पनि युक्रेन एक हप्तामै गोलीविहीन हुने बताएका छन् । उनले भने, “यस्तै कुरा रक्षा प्रणालीमा पनि लागु हुन्छ। सहायता रोकियो भने गोलाबारुद एक हप्तामा सकिनेछ ।” राष्ट्रपति पुटिनले संसार यति जटिल र विविधतायुक्त भएको भन्दै यसलाई एउटै ढाँचामा फिट गर्न नसकिने बताएका छन् ।
यसको पछाडि पश्चिमा शक्ति भए पनि शताब्दीयौंदेखिको औपनिवेशिकतामा जम्मा भएको विशाल शक्ति भएको उनले टिप्पणी गरेका छन् । पुटिनले अहिलेको विश्वव्यापी संकट मुख्यतया पश्चिमाहरूले निम्त्याएको बताएका छन् । पुटिनले एक्काइसौं शताब्दीको सुरुमा विश्वका देश र जनताले पछिल्लो शताब्दीको महँगो, विनाशकारी सैन्य–वैचारिक द्वन्द्वबाट पाठ सिकेको आशा गरेपनि त्यसो हुन नसकेको बताएका छन् ।
यसैबीच बिहीबार पूर्वी युक्रेनको एउटा गाउँमा रहेको एउटा क्याफे र स्टोरमा रुसी रकेट प्रहार हुँदा कम्तीमा ५१ सर्वसाधारणको मृत्यु भएको छ । यो जानकारी युक्रेनी राष्ट्रपति भोलोडिमिर जेलेन्स्की र कीभका अन्य शीर्ष अधिकारीहरूले दिएका छन् ।
युक्रेनका सहयोगीहरूलाई समर्थन जुटाउन ५० युरोपेली नेताहरूको शिखर सम्मेलनमा भाग लिन जेलेन्स्की स्पेनमा हुँदा आक्रमण भएको हो। उनले ह्रोजा गाउँमा भएको हमलालाई रुसी क्रूर अतिक्रमण र पूर्ण रूपमा जानाजानी आतंकवादी कार्य भएको भन्दै निन्दा गरेका छन् ।
