२५ असोज, काठमाण्डौ ।
इजरायल र हमासबीचको युद्ध छैटौँ दिनमा प्रवेश गरेको छ । यस युद्धमा हालसम्म २४ सय मानिसले ज्यान गुमाएका छन् । हमासको आक्रमणमा इजरायलमा १२ सयको मृत्यु हुँदा इजरायली सेनाको हवाई कारबाहीमा गाजाक्षेत्रमा पनि १२ सय प्यालेस्टाइनीको मृत्यु भएको छ । गाजाबाट विस्थापित हुनेको संख्या तीन लाख ३८ हजार पुगेको राष्ट्रसंघले जनाएको छ ।
इजरायल सरकारका अनुसार हमासले शनिबारको आक्रमणपछि १५० जनालाई अपहरण गरेर गाजा पट्टीमा बन्दी बनाएको छ । हमासले इजरायलको हवाई आक्रमण जारी रहे अपरहण गरिएका सबैको ज्यान लिने धम्की दिएको छ । यस्तोमा इजरायल सरकारले हवाई आक्रमण कम गरेर जमिनमा युद्ध गर्ने रणनीति लिएको छ ।
बीबीसीका अनुसार यतिबेला गाजालाई पूर्ण रूपमा घेराबन्दी गरेर इजरायलले सिमानामा ३ लाख सेना तैनाथ गरेको छ । ती सेनालाई गाजाक्षेत्रभित्रै पठाइने सम्भावना छ । यसो हुँदा अब हवाई आक्रमण बन्द हुनेछ र मैदानमा हमासका लडाकुसँग युद्ध चल्नेछ । मैदानमा हुने युद्ध जिते अपहरणमा परेका मानिसहरू सकुशल उद्धार गर्न सकिने इजरायलको सोच छ ।
पछिल्लोपटक हमासको आक्रमणमा इजरायलको हवाई प्रतिरक्षा प्रणाली कमजोर देखिएको विश्लेषण पनि भइरहेको छ । गत शनिबार एकै दिन हमासले ५ हजार रकेट र क्षेप्यास्त्र इजरायलतर्फ आक्रमण गरेको थियो । इजरायलमा आइरन डोम भनिने हवाई प्रतिरक्षा प्रणालीले ९६ प्रतिशत आक्रमणलाई रोक्ने दाबी गरिन्छ । तर, यसपटक आइरन डोम असफल भएको टिप्पणी भइरहेको छ ।
पहिलेजस्तो हमासले यसपटक आक्रमणको कुनै चेतावनी दिएन, साथै उनीहरूले दोस्रो विश्वयुद्धताकाको युद्ध रणनीति अपनाएका कारण पनि यसपटक इजरायलतर्फ धेरै क्षति हुन पुगेको हो । यस्तै हमासका लडाकुहरू समुद्र, सीमाक्षेत्र र आकाशबाटै इजरायल प्रवेश गरेका थिए । इजरायली सेनाका प्रवक्ता रिचर्ड हेचले प्यालेस्टिनी लडाकुहरू प्यारासुटबाट इजरायलको समुद्री तथा स्थल क्षेत्रमा प्रवेश गरेको पुष्टि गरेका छन्।
इजरायलविरुद्ध हमासले प्यारासुटबाट उत्रिएर यसरी आक्रमण गरेको यो नै पहिलोपटक हो । अग्रमोर्चामा रहेको आफ्नो सैन्य टोलीलाई विपक्षीको रेखा पार गराउन सकिन्छ भन्ने उद्देश्यका साथ मोटर प्यारासुटको प्रयोग गरिन्छ । दोस्रो विश्वयुद्धको समयमा जर्मन, जापानजस्ता देशले प्यारासुटबाट आफ्ना सेनालाई अन्य देशको भूमिमा उतारेका थिए ।
अमेरिकाको पर्ल हार्बरमा जापानी सेनाले प्यारासुटबाट अवतरण गरेर भीषण आक्रमण गरेको घटनालाई अझै सम्झिने गरिन्छ । हमासले प्रयोग गरेको मोटर प्यारासुटको माध्यमबाट प्याराग्लाइडरहरू जमिनबाट औसत ५ हजार मिटरको उचाइमा तीन घण्टासम्म उड्न सक्छन् ।
प्याराग्लाइडिङ वेबसाइटहरूका अनुसार उनीहरूले २३० किलोसम्म बोक्न सक्छन् वा उनीहरू चार जना व्यक्तिसम्मलाई एकैसाथ उडाउन सक्छन् । इजरायली सञ्चारमाध्यमहरूका अनुसार इजरायली वायु रक्षा प्रणाली आइरन डोम र राडारजस्ता प्रणालीले क्षेप्यास्त्र र रकेटजस्ता हतियारलाई पत्ता लगाउन सक्छन्, तर प्यारासुटमा आएका दुस्मनलाई प्रतिरक्षा प्रणालीले पत्ता लगाउन नसक्दा यसपटक इजरायलमा धेरै मानिसले ज्यान गुमाएका छन् ।
यसबाट इजरायल आफ्नो प्रतिरक्षा प्रविधिमा पूर्ण रूपमा विश्वस्त र निर्भर थिए भन्ने स्पष्ट हुन्छ । यदि सीमाक्षेत्रमा प्रतिरक्षा प्रणालीसँगै सेना पनि तैनाथ भए उनीहरूले प्यारासुटबाट आएका मानिसहरूलाई आकाशमै विफल बनाउन सक्थे । यसैबीच इजरायल र प्यालेस्टाइनी लडाकु समूह हमासबीच जारी द्वन्द्वबारे छलफल गर्न शुक्रबार पुनः संयुक्त राष्ट्रसंघीय सुरक्षा परिषद्को बैठक बस्ने भएको छ ।
आइतबार बसेको बैठकमा इजरायल र प्यालेस्टाइनका विषयमा सुरक्षा परिषद्का सदस्यहरू विभाजित थिए । यसैबीच, अमेरिकी विदेशमन्त्री एन्टोनी ब्लिेन्केनले बिहीबार इजरायलको भ्रमण गर्दै छन् । उनले प्यालेस्टाइनी राष्ट्रपति महमुद अब्बाससँग पनि भेट गर्ने बताइएको छ । राष्ट्रपति अब्बास हमाससँग जोडिएका छैनन् ।
उनले वेस्ट बैंकमा फतह ‘मुभमेन्ट’ नेतृत्वको सरकार चलाएका छन् । हमासले गाजापट्टीमा शासन गर्दै आएको छ । इजरायलले गाजातर्फ औषधि, खाना, इन्धन, पानी, बिजुलीलगायत सामग्रीको आपूर्ति बन्द गरेको छ । गाजाको एक मात्र विद्युत् केन्द्र बन्द भएको छ । अमेरिकाले इजरायल, राष्ट्रसंघ र इजिप्टसँग केही सहायता पठाउन र स्थानीय बाहिर निस्कने व्यवस्थाका लागि छलफल गरिरहेको बताइएको छ ।
