१४ कार्तिक, काठमाण्डौ ।
संयुक्त राष्ट्रसंघका महासचिव एन्टोनियो गुटेरेसले आज संघीय संसदमा सम्बोधन गर्दैछन् । महासचिव गुटेरेसले दिउँसो ४ बजे राष्ट्रिय सभा र प्रतिनिधिसभाको संयुक्त बैठकलाई सम्बोधन गर्ने संघीय संसद सचिवालयले जनाएको छ । महासचिव गुटेरेसले सम्बोधन गर्ने भएपछि सभामुख देवराज घिमिरेले सोमबार बेलुका नै सभा कक्षको निरीक्षण गरेका थिए ।
सभामुख घिमिरेले यसअघि नै बैठक सुरु हुनुअघि पौने ४ बजेभित्र औपचारिक पोशाकमा संसदमा उपस्थित भइसक्न सांसदहरूलाई निर्देशन दिइसकेका छन् । गुटेरेसले सम्बोधन गर्ने भएकोले आजको संसदमा संवैधानिक निकायका पदाधिकारी लगायत अन्य उच्च पदस्थ व्यक्तिहरूलाई पनि उपस्थितिका लागि निमन्त्रणा दिइएको छ ।
आइतबार बिहान नेपाल आइपुगेका महासचिव गुटेरेस आज अन्नपूर्ण आधारशिविर पुगेर लुम्बिनीको अवलोकन सकेर संसदलाई सम्बोधन गर्न आइपुग्ने कार्यक्रम छ । महासचिव गुटेरेस बुधबार फर्किनेछन् । राष्ट्रसंघको महासचिवको हैसियतमा गुटेरेसले रोस्ट्रममा उभिएर पहिलो पटक सम्बोधन गर्न लागेका हुन् ।
यसअघि पटक–पटक राष्ट्रसंघीय महासचिवले नेपाल भ्रमण गरेका थिए । तर, संसद्को रोस्ट्रममा उभिएर सम्बोधन गर्ने गुटेरेस पहिलो महासचिव हुनेछन् । आजसम्म नेपालको संसदमा केही मुलुकका सरकार प्रमुख, तथा विशिष्ट अथितिहरुले सम्बोधन गरेका छन् ।
२०४४ सालमा सदनका रुपमा तत्कालिन राष्ट्रिय पञ्चायतलाई तत्कालीन जर्मन चान्सलर हेल्मुट कोहलले सम्बोधन गरेका थिए । २०४५ मा भारतीय लोकसभा अध्यक्ष डा. बलराम जाखरले पनि तत्कालीन राष्ट्रिय पञ्चायतको अवलोकन गर्न नेपाल आउँदा भदौ २१ मा राष्ट्रिय पञ्चायत पुगेका थिए ।
उनी राष्ट्रिय पञ्चायतभित्र रहँदा नारावाजी भएपछि अप्ठ्यारो परिस्थिति पैदा भएको थियो । सन् २०१४ मा पहिलो पटक प्रधानमन्त्री चुनिएपछि नरेन्द्र मोदीले नेपाल भ्रमण गरेका थिए । त्यसबखत उनले नेपालको सदनलाई सम्बोधन गरेका थिए ।
मोदीले १९ साउन २०७१ मा सदनलाई सम्बोधन गरेका थिए । यस्तै म्यानमारकी प्रजातन्त्रवादी नेतृ तथा नोबेल शान्ति पुरस्कार विजेता र लोकतान्त्रिक प्रतिमा आङ सान सुकीले पनि नेपाल भ्रमण गरेकी थिइन् । उनले २०७१ जेठ ३० गते नेपाल भ्रमण गरेकी थिइन् । नेतृ सुकीले संसदको ल्होत्से हलमा आफ्नो सम्बोधन गरेकी थिइन् ।
