१७ कार्तिक , काठमाण्डौ ।
गाजापट्टीमा युद्ध चलिरहँदा हमासको समर्थनमा इजरायलविरुद्ध रकेट प्रहार गरिरहेको लेबनानी शसस्त्र समूह हिज्बुल्लाहलाई अब वाग्नर ग्रुपले पनि सघाउने भएको छ । अमेरिकी गुप्तचर एजेन्सीले वाग्नर ग्रुपले हिज्बुल्लाहलाई एडभान्स्ड एयर डिफेन्स मिसाइल सिस्टम दिने तयारी गरिरहेको बताएको छ । न्यूयोर्क पोस्टका अनुसार अमेरिकी अधिकारीहरुले वाग्नर ग्रुपमाथि पनि नजर राखिरहेका छन् ।
रिपोर्टका अनुसार हिजबुल्लालाई वाग्नर ग्रुपले एसए २२ मिसाइल डिफेन्स सिस्टम पठाउने तयारी गरेको छ । यो डिफेन्स सिस्टम मिसाइलहरुलाई निस्तेज गर्न सक्षम छ । यसलाई ट्रकमा पनि सेट गर्न सकिने खालको छ । यसका साथै यो डिफेन्स सिस्टममा बन्दुकबाट पनि फायर गर्न सकिन्छ । एसए २२ सिस्टमको प्रयोग रुस र युक्रेनबीच जारी युद्धमा पनि भइरहेको छ ।
वाग्नर र हिज्बुल्लाह बीचमा चलिरहेको यस्तो डिलमा रुसको तर्फबाट भने अहिलेसम्म कुनै प्रतिक्रिया आएको छैन । अमेरिकी अधिकारीहरुका अनुसार हिज्बुल्लाह र वाग्नर समूहका सदस्यहरु यतिबेला सिरियामा यस डिलका लागि वार्ता गरिरहेका छन् । यदी वाग्नर ग्रुपबाट सहयोग मिले हमास पनि थप बलियो बन्ने छ । हमास र हिज्बुल्लाह दुवैलाई इरानबाट समर्थन प्राप्त छ ।
यता एकैसाथ हमास, हिज्बुल्ला, हुथी समूहबाट आक्रमण झेलिरहेको र गाजापट्टीमा युद्ध रोक्न चौतर्फी दबाव खेपिरहेको इजरायली सेनाले भने अहिले गाजा सहरलाई पूर्ण रूपमा घेराबन्दी गरिएको जनाएको छ । योसँगै हमासका सैन्य क्याम्प, हेडक्वार्टर र अरू पूर्वाधारमा आक्रमण गरिरहेको इजरायली सेनाले जनाएको छ । इजरायल सरकारका प्रवक्ताले युद्धविराम अहिले सम्भव नभएको बताएका छन् ।
यसैबीच अमेरिकी विदेशमन्त्री एन्टोनी ब्लिन्केन अक्टोबर ७ यता तेस्रोपटक इजरायलको भ्रमणमा गएका छन् । यसैबीच, रिपब्लिकन नेतृत्वको अमेरिकी प्रतिनिधिसभाले इजरायललाई १४.३ अर्ब अमेरिकी डलर सहायता प्रदान गर्ने प्रस्ताव पारित गरेको छ । डेमोक्रेट पक्षले यो सिनेटबाट पारित नहुने र ह्वाइट हाउसले पनि ‘भिटो’ लगाउने भनेको अन्तर्राष्ट्रिय सञ्चारमाध्यमले जनाएका छन् ।
गाजामा इजरायलको आक्रमणविरुद्ध लडिरहेको हमासलाई लेबनानमा आधारित हिजबुल्लाहपछि हुथी समूह पनि समर्थनमा देखिएको छ । मंगलबार नै हुथी समूहले इजरायलविरुद्ध युद्ध लड्ने घोषणा गरेको बताइएको छ । तर, इजरायलबाट दुई हजार किलोमिटर टाढा यमनमा रहेको हुथीले प्रत्यक्ष रूपमा ठूलो मद्दत गर्न नसक्ने ठानिएको छ ।
अक्टोबर ७ यता इजरायलले गाजामा हवाई र ‘आर्टिलरी’ आक्रमण गरेको छ । गाजामा मृत्यु हुनेको संख्या नौ हजार नाघेको त्यहाँको स्वास्थ्य मन्त्रालयले जनाएको छ । हमासको आक्रमणमा परेर एक हजार ४०० भन्दा धेरै मानिसको मृत्यु भएको र २०० भन्दा बढीलाई बन्दी बनाइएको इजरायलले जनाएको छ ।
यसैबीच अमेरिकी ड्रोनहरु पनि गाजामा उडिरहेको पाइएको छ । अमेरिकाले गाजामा फसेका आफ्ना नागरिकहरुको जानकारी लिन ड्रोन उडाएको बताएको छ । अमेरिकी अधिकारीहरुका अनुसार उनीहरुका १० नागरिक बेपत्ता भएका छन् ।
