१७ कार्तिक, काठमाण्डौ ।
नेपाल टी—२० विश्वकप क्रिकेटमा छनोट भएको छ । नेपाल आज मुलपानी क्रिकेट मैदानमा खेलिएको सेमिफाइनल खेलमा संयुक्त अरब इमिरेट्स (यूएई) लाई आठ विकेटले हराउँदै टी—२० विश्वकपमा १० वर्षपछि छनोट भएको हो । जितसँगै नेपाल एसियाली क्षेत्रको अन्तिम चरणको छनोट प्रतियोगिताको फाइनलमा पनि पुगेको छ ।
नेपालले अब आइतबार हुने फाइनलमा ओमानसँग उपाधिका लागि भिडन्त गर्नेछ । ओमान भने शुक्रबार नै खेलिएको सेमीफाइनलमा बहराइनलाई १० विकेटले हराउँदै फाइनलमा पुगेको हो । जारी छनोट प्रतियोगिताको फाइनलमा पुग्ने दुबै टोलीले आगामी टी—२० विश्वकप खेल्न पाउने प्रावधान छ ।
टी—२० विश्वकपको नवौँ संस्करण सन् २०२४ मा अमेरिका र वेस्ट इन्डिजले संयुक्त रुपमा आयोजना गर्दैछन् । यसअघि समूह चरणको अन्तिम खेलमा नेपाल ओमानसँग ५ रनको झिनो अन्तरले पराजित भएको थियो । अब नेपाललाई त्यो हारको बदला लिदै विश्वकप छनोटको उपाधि रक्षा गर्ने अवसर मिलेको छ ।
दुई देशबीचको फाइनल खेल त्रिवि क्रिकेट मैदान कीर्तिपुरमा हुनेछ । जहाँ नेपाललाई घरेलु दर्शकको अपार साथ समेत रहने छ । समूह चरणको दुई खेल खेल्दा नेपालको अलराउन्ड प्रदर्शन गरेका महत्वपूर्ण सदस्य दीपेन्द्र सिंह ऐरी अब ओमानसँगको फाइनलमा खेल्नेछन् । उनले यसअघि ओमानसँगको खेल गुमाएका थिए ।
ओमान टि २० बरीयतामा नेपालभन्दा ४ स्थान तल २० औ स्थानमा छ । गत महिना यूएईलाई हराएर गल्फ क्रिकेट टी–२०को उपाधि जितेको तथा समूह चरणमा नेपाललाई हराएर समूह विजेता बनेको ओमान पनि लयमा छ र उपाधि दाबेदारी गरिरहेको छ । विश्वकप छनोटमा ओमान र मलेसियाबीचको खेलमा ओमान ३२ रनले विजयी भएको थियो भने ओमानले सिङ्गापुरलाई २२ रनले पराजित गरेको छ ।
नेपाल र ओमानबीच टी–२० अन्तर्राष्ट्रिय खेलमा अहिलेसम्म पाँच पटक प्रतिस्पर्धा भएको छ। जसमा नेपालले पछिल्ला तीन खेलमा जित निकालेको छ। नेपालले गत वर्ष भएको विश्वकप छनोटका दुवै खेलमा ओमानलाई हराएको थियो। २०२२ को फेब्रुअरीमा भएका खेलमा नेपाल ९ विकेट र ३९ रनले विजयी भएको थियो।
त्यसअघि २०२२ कै फेब्रुअरीमै भएको टी–२० सिरिजमा पनि नेपालले ओमानलाई ६ विकेटले पराजित गरेको थियो। नेपाल र ओमानबीच पहिलो टी–२० भने २०१९ को अक्टोबरमा भएको थियो। ओमानमा भएको टी–२० सिरिजको सो खेलमा नेपालमाथि ओमानले ६ विकेटको जित निकालेको थियो। टी—२० विश्वकपको नवौँ संस्करण अमेरिका र वेस्ट इन्डिजमा संयुक्त रूपमा आयोजना हुँदैछ ।
एसियाली क्षेत्रको अन्तिम चरणको छनोट प्रतियोगितामा विभिन्न आठ राष्ट्रको सहभागिता रहेको छ । जुन ४ देखि ३० सम्म अमेरिका र वेस्ट इन्डिजमा आयोजना हुने टी—२० विश्वकपमा २० टोलीको सहभागिता रहने छ । हालसम्म १८ टोली छनोट भइसकेका छन् ।
नेपालले दोस्रो पटक टी—२० विश्वकप खेल्ने अवसर पाएको हो । यसअघि नेपालले सन् २०१४ मा टी—२० विश्वकप खेलेको थियो । नेपाली टोली बंगलादेशमा आयोजित त्यो विश्वकपको प्रारम्भिक चरणबाटै बाहिरिएको थियो ।
