१० मंसिर,एजेन्सी ।
चीनले केही देशका नागरिकलाई भिसा बिना आफ्नो देशमा आउन दिने भएको छ । चीनको विदेश मन्त्रालयका अनुसार फ्रान्स, जर्मनी, इटाली, नेदरल्याण्ड्स, स्पेन र मलेसियाका नागरिकले अब भिसा बिना चीनको भ्रमण गर्न सक्नेछन् । यो योजना हाल ‘परीक्षणकाल’ मा रहनेछ ।
यही डिसेम्बर ३० देखि सन् २०२४ को नोभेम्बरसम्ममा ति देशका साधारण पासपोर्ट बाहक नागरिकले चीनमा भिसा बिना १५ दिन बिताउन पाउनेछन् । त्यसअवधिमा उनीहरुले चीनमा व्यापारसँगै घुमघाम गर्न सक्नेछन् । यही महिना चीनले भिसा फ्रि ट्रान्जिट पोलिसी अन्तर्गत सुविधा पाउने देशमा नर्वेलाई पनि समावेश गरेको थियो ।
हाल त्यस्तो सुविधा पाउने देशको संख्या ५४ रहेको छ । कोरोना महामारी फैलिएपछि चीनले आफ्नो भिसा नीतिमा कडाइ गरेको थियो । हाल चीनले विस्तारै भिसा नीतिलाई खुकुलो बनाउँदै लगेको छ । यसअघि सिंगापुर र ब्रुनाइका नागरिकले पनि बिना भिसा चीनमा १५ दिन व्यापार र घुमघाम गर्न सक्थे ।
चीनको उच्चस्तरीय विकास र खुलापनलाई प्रबद्र्धन गर्न यो कदम चाल्न लागिएको चिनियाँ विदेश मन्त्रालयकी प्रवक्ता माओ निङले बताएकी छिन् । हाल एकाध मुलुकबाहेक सबैलाई चीन प्रवेशका लागि भिसा चाहिन्छ । तर, सिंगापुर र ब्रुनाइका नागरिकले व्यवसाय, पर्यटन, पारिवारिक भ्रमण वा ट्रान्जिटका लागि चीन प्रवेश गर्न भिसा चाहिँदैन ।
