१७ मंसिर,एजेन्सी ।
इलेक्ट्रिक भेहिकल निर्माता टेस्लाले आफ्नो बहुप्रतिक्षित साइबरट्रक लन्च गरेको छ । उसले साइबरट्रक नामको यो नयाँ इलेकट्रिक पिकअप बजारमा ल्याएको छ । टेस्लाले चार वर्षमा पहिलो पटक नयाँ मोडेल ल्याएको हो । सीईओ इलोन मस्कले टेक्ससमा ग्राहकहरुलाई यो ट्रक हस्तान्तरण गरेका छन् ।
तर तत्काल ठूलो मात्रामा यसको उत्पादन गर्न नसकिने पनि उनले बताएका छन् । यो वाहन बेचेर राम्रो आम्दानी गर्न १८ महिनासम्म लाग्नसक्ने उनको भनाई छ । यसको मूल्य ६० हजार ९९० डलरबाट सुरु हुनेछ । जुन २०१९ मा मस्कले भनेभन्दा ५० प्रतिशत ज्यादा हो ।
चम्किलो स्टेनलेस स्टीलबाट बनेको र समतल विमानको आकारमा बनेको यो ट्रक १९७७ जेम्स बन्डको फिल्म “द स्पाइ हु लभ्ड मी” मा कारबाट बनेको पनडुब्बीबाट प्रेरित भएको मस्कले भनेका छन् । २०१९ मा मस्कले यो वाहन ४० हजार डलरमा आउने बताएका थिए ।
एक पटक चार्ज गर्दा ५०० माइल दौडिने दाबी पनि उनले गरेका छन् । उनले भनेभन्दा दुई वर्ष ढिला साइबरट्रकको डेलिभरी सुरु गरिएको छ । कम्पनीले ४७० माइल (७५६ किलोमिटर) दायराको साइबरट्रक लन्च गरेको हो ।
ग्राहकहरुले यसको लागि चार वर्ष पर्खिएका थिए र धेरै ढिलाइ पछि, टेस्लाले आधिकारिक रूपमा साइबरट्रकको डेलिभरी सुरु गरेको हो । पहिलो डेलिभरीको साथ, टेस्लाले आफ्नो पहिलो इलेक्ट्रिक पिकअप ट्रकको लागि आधिकारिक स्पेशिफिकेसन र मूल्यहरू जारी गरेको छ ।
साइबरट्रकको मूल्य सन् २०१९ मा मस्कले उल्लेख गरेको भन्दा करिब ५० प्रतिशत बढी छ । यसको नयाँ बडी मटेरियल र अपरंपरागत, फ्युचरिस्टिक स्टाइलले उत्पादनमा जटिलता र लागत थपेको छ, र उपयोगितामा ध्यान केन्द्रित गर्ने परम्परागत पिकअप ट्रक खरिदकर्ताहरूलाई यसबाट अलग्याउन सक्नेछ ।
तर गाडीको तीन भेरियन्टको मूल्य ६०,९९० डलर र ९९,९९० डलरको बीचमा राख्ने मस्कले साइबरट्रकको “ट्रक भन्दा बढी उपयोगिता” रहेको र “स्पोर्ट्स कार भन्दा तिब्र” रहेको बताएका छन् । उनले अस्टिन, टेक्सासमा भएको एक कार्यक्रममा करिब एक दर्जन ग्राहकहरूलाई गाडीहरू हस्तान्तरण गरेका थिए ।
टेस्लाले “पावरसेयर” भनेर चिनाउने गाडीले गाडी–देखि–घरको कार्यक्षमतामा पनि सक्षम रहेको बताएको छ । यसको बेडमा रहेको २४० भोल्ट आउटलेटलाई अन्य विद्युतीय सवारी साधनहरू पनि सजिलै चार्ज गर्न प्रयोग गर्न सकिन्छ ।
साइबरट्रकको सबैभन्दा लामो–दायरा संस्करणले अनुमानित ३४० माइल (५४७ किमी) ड्राइभ गर्न सक्छ, र “रेन्ज एक्सटेन्डर” वा अतिरिक्त ब्याट्री प्याकको साथ आउँछ जसले यसको दायरा ४७० माइलसम्म विस्तार गर्दछ ।
