२५ मंसिर,काठमाण्डौ ।
प्रधानमन्त्री पुष्पकमल दाहाल प्रचण्डका राजनीतिक सल्लाहाकार हरिबोल गजुरेलले राजीनामा दिएका छन् । एनसेल प्रकरणमा प्रधानमन्त्रीलाई समेत जोडेर हेरिरहेका बेला राजनीतिक सल्लाहाकार बाहिरिएका हुन् । प्रधानमन्त्री पुष्पकमल दाहाल प्रचण्डको कार्यशैलीप्रति असन्तुष्टि जनाउँदै गजुरेलले राजीनामा दिएका हुन् ।
उनी मन्त्री सहरको सेवा सुविधा तथा वरियतामा रहने गरी राजनीतिक सल्लाहकारको भूमिकामा थिए । उनले सल्लाहाकारका रुपमा आफ्नो भूमिका नभएको र प्रधानमन्त्री दाहाल परिवारवादमा फसेको भन्दै पद छाडेको दाबी गरिएको छ ।
प्रधानमन्त्रीको स्वकीय सचिवका रुपमा रहेकी पुत्री गंगा नै सर्वेसर्वा हुने र प्रधानमन्त्री त्यसकै घेराबाट बाहिर निस्कन नसकेको गजुरेलको गुनासो छ । त्यस्तै उनले आफ्नो गृह जिल्लाको राजनीतिक गतिविधिमा आफूलाई बाइपास गरेको बताउँदै आएका थिए ।
पार्टीका केही नेता उनलाई राष्ट्रियसभा सदस्य बनाउनुपर्ने पक्षमा छन् । प्रचण्ड निकटले भने उनी पार्टी काममा व्यस्त हुनु परेकाले राजीनामा दिएको दाबी गरेका छन् । यसैबीच प्रधानमन्त्री पुत्री गंगा दाहालको आदेशमा आफ्नो व्यक्तिगत सुरक्षा अधिकृत (पीएसओ) हटाइएको सांसद अमेरशकुमार सिंहले आरोप लगाएका छन् ।
सिंहले गृह मन्त्रालयबाट नभइ सिधै प्रधानमन्त्री निजी सचिवालयको आदेशमा आफ्नो सुरक्षा हटाइएको दाबी गरेका हुन् । सांसद सिंहका अनुसार, गृहमन्त्री नारायणकाजी श्रेष्ठसँग पनि यसबारे उनले सोधपुछ गरेका थिए। गृहमन्त्रीले सुरक्षाकर्मी हटाउनेबारे कुनै औपचारिक निर्णय नगरेको र हटाइएकोबारे आफूलाई जानकारी समेत नभएको बताएको सांसद सिंहको भनाइ छ ।
सांसद सिंहले आइतबार बिहान प्रधानमन्त्री पुत्री दाहालले व्यापारीसँग कुन मामिलामा कति रकम बुझेको भन्ने सबै प्रमाण आफूसँग सुरक्षित रहेको सामाजिक सञ्जाल फेसबुकमार्फत बताएका थिए । केही समययता सांसद सिंह सरकारप्रति आक्रामक रुपमा प्रस्तुत हुँदै आएका छन् ।
प्रधानमन्त्री पुष्पकमल दाहाल प्रचण्डको सचिवालयले भने सांसद अमरेश कुमार सिंहले सरकारको पूर्णता पाएसँगै बार्गेनिङ सुरू गरेको दाबी गरेको छ । सचिवालयका तर्फबाट एक विज्ञप्ति जारी गर्दै सचिवालयले यस्तो दाबी गरेको हो ।
सिंहले प्रधानमन्त्री पुत्री गंगा दाहालका विषयमा सामाजिक सञ्जालमा राखेका धारणापछि सचिवालयको यस्तो टिप्पणी आएको हो । सांसद सिंह नेपाली कांगेस छाडेर सर्लाही–४ बाट प्रतिनिधिसभा निर्वाचनमा स्वतन्त्र सांसदका रुपमा विजयी भएका थिए ।
