Nepal Times
Nepal Times
1.63k
Shares

विनोद चौधरीका छोरा श्रीलंकामा सुन फलाउँदै

विनोद चौधरीका छोरा श्रीलंकामा सुन फलाउँदै

८ पुष,एजेन्सी ।
विश्वकै धनाढ्य सूचीमा पर्ने नेपालका एक्ला अर्बपति एवं नेपाली कांग्रेसका सांसद विनोद चौधरीका छोरा निर्वाण चौधरी श्रीलंकाको यूनियन बैंक अफ कोलम्बोको संचालक समितिको अध्यक्ष बनेका छन् । उनी चौधरी समूहका उपाध्यक्षसमेत हुन् । निर्वाणलाई गत बिहिबार यूनियन बैंकको अध्यक्ष पदमा नियुक्त गरिएको थियो । उनी नबिल बैंकका सञ्चालक समेत हुन् ।

चौधरी समूहले ०७९ मंसिरमा यूनियन बैंक अफ कोलम्बोको ७०.८४ प्रतिशत सेयर किनेको थियो । श्रीलंका चरम आर्थिक संकटमा फसेका बेला श्रीलंकाको आठौं ठूलो बैंक रहेको यूनियन बैंक अफ कोलम्बोको पनि समस्यामा परेको थियो । चौधरी समूहको सिजी क्यापिटल पार्टनर्सले ९ अर्ब १० करोड श्रीलंकाली रुपैयाँमा उक्त सेयर किनेको थियो ।

सिजी क्यापिटल पार्टनर्स चौधरीको सीजी कर्प ग्लोबल र रविभक्त श्रेष्ठ अध्यक्ष रहेको आइजे ग्रुप (साबिक एनई ग्र्ुप)को संयुक्त लगानीमा सिंगापुरमा दर्ता भएको निजी इक्विटी कम्पनी हो । निर्वाण गत अक्टोबर २०२३ मा यूनियन बैंकको सञ्चालक समितिमा सञ्चालक नियुक्त भएका थिए ।

उनी सिंगापुरमा रहेको सिजी क्यापिटल पार्टनर्स प्रालिका प्रबन्ध निर्देशकको हैसियतमा बैंकमा सञ्चालक भएका हुन् । ७०.८४ प्रतिशत सेयर स्वामित्व रहेको चौधरी समूहका तर्फबाट नेपाली नागरिक सञ्जय पोखरेल र मलय मुखर्जीलाई सञ्चालकमा नियुक्ति गरिसकेको छ ।

मुखर्जी संस्थापक सेयरधनीका तर्फबाट नबिल बैंकको सञ्चालक पनि हुन् । त्यतिमात्र होइन, मुखर्जी यूनियन बैंक अफ कोलम्बोको सहायक कम्पनी युबि फाइनान्सका अध्यक्ष हुन् भने पोखरेल सदस्य हुन् । विश्वविख्यात म्यागेजिन फोर्ब्सको डलर अर्बपतिको सूचीमा पर्ने पहिलो र एकमात्र नेपाली व्यवसायी विनोदका जेठा छोरा हुन् निर्वाण ।

काठमाडौं विश्वविद्यालयबाट स्नातकोत्तर तहसम्मको अध्ययन पूरा गरेका निर्वाणले र लन्डन बिजनेस स्कूल, बेलायत र अमेरिकाको म्यासाचुसेट्स इन्स्टिच्युट अफ टेक्नोलोजीबाट उद्यमशीलता विषयमा समेत स्नातकोत्तर गरेका छन् ।

निर्वाणले चौधरी समूहका खासगरी बैंक तथा वित्तीय संस्था, प्रविधि र अटोमोवाइल क्षेत्रको व्यवसाय हेर्दै आएका छन् । चौधरी समूह र इन्डियन होटल्स कर्पोरेसन लिमिटेडको संयुक्त लगानीमा चर्चित ताज होटेल श्रीलंकाको कोलम्बोमा रहेको समुद्री तटमा सन् २००१ देखि सञ्चालित छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.