५ पुष, विराटनगर ।
५ दलको गठबन्धन भएपनि वर्तमान सरकारको मजबुत जग भनेको हाल संसदको सबैभन्दा ठूलो दल नेपाली काँग्रेस हो । तर काँग्रेसका सभापति र उनको गुट जति प्रचण्डप्रति अहिलेसम्म वफादार नै देखिएको छ, शेखर–गगनको इतर समूहले भने प्रचण्ड नेतृत्वलाई सुरुदेखिनै प्रहार गर्दै आएको छ । यो समूहले बारम्बार प्रचण्डको वर्हिगमन अनिवार्य भइसकेको धारणा सार्वजनिक गरिरहेको छ ।
आफ्नै पार्टीका नेताहरु सदस्य भएको मन्त्रीपरिषदको मुखिया प्रचण्डलाई शेखर–गगनहरुले नसच्चिए बालुवाटारबाट खुमलटार पुर्याइदिने चेतावनी पटक पटक दिदै आएका छन् । पछिल्लो पटक एक वर्ष पुरा गरेर नयाँ ढङ्गले अगाडी बढ्ने तयारीका साथ मन्त्रीपरिषद् पुनर्गठनको प्रचण्डले तयारी गर्दै गर्दा महामन्त्री थापाले ‘राम्रो काम गर्न नसके’बालुवाटारबाट खुमलटार पु¥याउने चेतावनी दिएका छन् ।
यो उनको पहिलो चेतावनी भने होइन । उनले पटक–पटक धम्की र चेतावनी दिन्छन् । शनिवार भक्तपुरमा आयोजित एक कार्यक्रमलाई सम्बोधन गर्दै उनले प्रधानमन्त्री दाहालले सरकारमा रहेर राम्रा काम गर्न नसके बालुवाटारबाट खुमलटार पठाउने हैसियत काँग्रेसको रहेको बताएका थिए ।
यस अघि मङ्सिरको अन्तिम साता पनि थापाले काँग्रेसले प्रचण्डलाई बालुवाटारबाट खुमलटार जानुस् भन्ने आँट गर्नुपर्छ भनेर भाषण गरेका थिए । यस्तै शेखर कोइरालाले पनि प्रचण्डले सरकार छाड्नु पर्ने आशयसहितको कयौं पटक धारणा राखिसकेका छन् । यी दुई नेतामात्रै होइन काँग्रेसका कयौं नेताहरुले प्रचण्डको खुलेर आलोचना गरेका छन् ।
काँग्रेसको आन्तरिक बैठकहरुमा प्रचण्ड सरकार बदनाम नै भइसकेको नेताहरुको भनाई छ । बिहीबार सुरु भएर शनिबार सकिएको काँग्रेसको केन्द्रीय कार्यसमिति बैठकमा प्रधानमन्त्री दाहाल र सरकारमा सहभागी आफ्नै मन्त्रीहरूको कार्यशैलीप्रति केन्द्रीय सदस्यहरूले खुलेर आलोचना गरे ।
तीन दिनसम्म सयभन्दा बढी केन्द्रीय सदस्य र पदाधिकारीले धारणा राख्दा मन्त्रीबाहेक अधिकांशले सरकारको आलोचना गरेका थिए । सो क्रममा पनि महामन्त्री गगन थापाले अहिलेकै धीमा गतिमा सरकार चल्ने हो भने मन्त्री मात्रै नभएर प्रधानमन्त्रीसमेत बदल्नुपर्ने धारणा बैठकमा राखेका थिए । अर्का महामन्त्री विश्वप्रकाश शर्माले समेत सरकारका कामप्रति खुलेरै असन्तुष्टि जनाए ।
शर्माले ललितपुरको बालकुमारीमा भएको घटनाको दोषी प्रधानमन्त्री, गृहमन्त्री वा प्रदर्शनकारी को हो ? त्यसको जबाफ दिनुपर्ने बताए । केही दिनअघि प्रधानमन्त्री कांग्रेसकै मन्त्रीहरूको कामबाट असन्तुष्ट भनेर आएको समाचारप्रति संकेत गर्दै गगन थापाले प्रधानमन्त्रीको कार्यशैली नै राम्रो नभएको बताए ।
केन्द्रीय सदस्य अर्जुननरसिंह केसीले सरकारको कामबाट चित्त बुझाउने ठाउँ नभएको भनाइ राखे । केन्द्रीय सदस्य अजयबाबु शिवाकोटीले बैठकमा सरकारको प्रतिरक्षा गर्ने केन्द्रीय सदस्य नै नभएको भन्दै यसले सरकारको कामकारबाही बदल्नुपर्ने नत्र मन्त्री नै बदल्नुपर्ने सन्देश दिएको बताए ।
अर्का केन्द्रीय सदस्य रामहरि खतिवडाले मन्त्रीका कार्यशैली परिवर्तन नभएमा मन्त्री नै फेर्नुपर्ने आवाज बैठकमा उठेको बताए । यस्तै केन्द्रीय सदस्य भीम पराजुलीले संस्कृति पर्यटन तथा नागरिक उड्डयनमन्त्री सुदन किराँती इसाईको धर्म प्रचार गर्दै हिँडेको भन्दै बर्खास्तीको माग गरे ।
पार्टीको केन्द्रीय समिति बैठकमा १० बुँदे प्रस्ताव राख्दै उनले मन्त्रीलाई बर्खास्त गर्नुपर्ने र कांग्रेसले धर्म संस्कृति विभाग गर्नुपर्ने बताएका छन् । कांग्रेस कोशी प्रदेशसभा सदस्य समेत रहेका पराजुलीले इपिएस भाषा परीक्षामा भाग लिन पाउँ भन्दा युवाहरूले ज्यान गुमाउनु परेको भन्दै उनले राज्यलाई कसले जनता मार्ने अधिकार दिएको छ भन्दै प्रश्न गरेका छन् ।
पार्टीबाट सरकारको नेतृत्व गरेका उपप्रधान तथा रक्षामन्त्री पूर्णबहादुर खड्काले सरकारमाथि आलोचनाको प्रतिवाद गर्दै सरकारले मध्यम गतिमा काम गरेको बताए । उनले सरकारका बारेमा उठेका प्रश्नहरू प्रधानमन्त्रीलाई भेटेर जानकारी गराउने आश्वासन दिएका छन् ।
केन्द्रीय नेताहरुले सरकार र प्रधानमन्त्रीको आलोचना गरेपनि प्रचण्ड सरकारप्रति सिंगो कांग्रेसको धारणा भने बदलिएको छैन्। नेपाली कांग्रेसले गठबन्धनमा भएको सहमति पूरा नभएसम्म पुष्पकमल दाहाल ‘प्रचण्ड’ नै प्रधानमन्त्री हुने प्रष्ट पारेको छ । केन्द्रीय समितिको बैठकको निर्णय सार्वजनिक गर्दै प्रचार विभाग प्रमुख मीनबहादुर विश्वकर्माले लोकतन्त्रमा स्थिर सरकार नहुने बताए ।
उनले भने, लोकतन्त्रमा सरकारको कुर्सीको तीनवटा मात्रै खुट्टा हुन्छन् । बहुमतमा होस् वा गठबन्धनमा । हिजो ओली नेतृत्वको सरकार झण्डै दुई तिहाइको बहुमतमा थियो । अहिले गठबन्धनमा छ । लोकतन्त्रमा स्थिर सरकार हुँदैन । निरंकुशतामा मात्रै हुन्छ । हाम्रो महामन्त्रीले मात्रै होइन आम जनताले पनि सरकार ढाल्दिन सक्छु भन्नसक्छ । उहाँ अहिले गठबन्धनबाट बनेको प्रधानमन्त्री भएकाले गठबन्धन नभत्किएसम्म र गठबन्धनमा भएको सहमति पूरा नभएसम्म उहाँ नै प्रधानमन्त्री हो ।’
