१७ पुष,एजेन्सी।
प्राकृतिक विपत्तिका रुपमा शक्तिशाली भूकम्पपछि उद्धारमा जुटिरहेको जापान एक ठूलो भवितब्यमा परेको छ । जापान एयरलाइन्सको एउटा विमानमा आगलागी भएको छ । आगलागीमा ५ जना बेपत्ता भएको बताइएको छ । जापान एयरलाइन्सको विमानमा आगलागी भएको घटनामा ५ जना वेपत्ता भएको समाचारमा जनाइएको छ ।
हनेदा विमानस्थलमा अवतरणको क्रममा कोस्ट गार्डको विमानसँग ठोक्किएर भएको भनिएको भीषण आगलागीमा ५ जना वेपत्ता भएका हुन् । घटना हुँदा विमानमा यात्री सवार थिए । जेएएल ५१६ विमानले जापानको होक्काइदोबाट उडान भरेको बताइएको छ ।
कोस्ट गार्डको विमानसँग ठोक्किएपछि आगलागी भएको रोयटर्सले उल्लेख गरेको छ । विमानमा सवार ३७९ यात्रु र चालक दलका सदस्य रहेका थिए । जापानी समाचारमाध्यम टिबिएस र एनएचकेका अनुसार कोस्टगार्डको विमानमा रहेका एक व्यक्ति दुर्घटनापछि भाग्न सफल भए पनि अन्य पाँच जनाको अवस्था अझै अज्ञात रहेको हो।
धावनमार्गमा रहेको कोस्ट गार्डको विमान र जापान एयरलाइन्सको विमान एकआपसमा ठोक्किएपछि दुर्घटना भएको बताइएको छ ।जापान एयरलाइन्सको फ्लाइट ५१६ ले साप्पोरो शहर नजिकैको न्यू चिटोस विमानस्थलबाट स्थानीय समयअनुसार अपराह्न ४ बजे उडान भरेको थियो ।
वेबसाइट फ्लाइटराडारका अनुसार विमान स्थानीय समयअनुसार साँझ ५ः४७ बजे हानेदा विमानस्थलमा अवतरण गरेको थियो । यो दुर्घटनापछि हानेदा विमानस्थलले तत्कालका लागि सबै रनवे बन्द गरेको छ । टोकियोस्थित हानेदा विमानस्थलमा अवतरणका क्रममा विमानमा आगलागी भएको हो ।
मंगलबार साँझ यो घटना भएको जापानको सार्वजनिक प्रसारक एनएचकेले जनाएको छ । घटनास्थलबाट सार्वजनिक तस्बिरमा विमान र धावनमार्गमा आगो देखिएको छ ।
