Nepal Times
Nepal Times
3
Shares

उपत्यकाका मेयरहरुले फोहोर उठाउन सकेनन्, सरकारलाई जिम्मा

उपत्यकाका मेयरहरुले फोहोर उठाउन सकेनन्, सरकारलाई जिम्मा

२० पुष, काठमाण्डौ ।

काठमाडौं भ्याली मेयर्स फोरमको छैटौं बैठकले काठमाडौं उपत्यकाको फोहोर व्यवस्थापनको कार्य नेपाल सरकारलाई नै जिम्मा लगाउने निर्णय गरेको छ । गोकर्णेश्वर नगरपालिकाको आयोजनामा बसेको बैठकले सो निर्णय गरेको हो । बैठकले नेपाल सरकार र नेपवेस्टको बीचमा २०१८ मा भएको सम्झौता हालसम्म कार्यान्वयन हुन नसकेको र नेपाल इन्भेष्टमेण्ट बोर्डले काठमाडौं महानगरपालिकालाई कार्यान्वयनका निमित्त पठाए पनि महानगरपालिकाले सरकारलाई नै फिर्ता पठाइसकेकाले सरकारले नै फोहोर व्यवस्थापनको बाँकी काम गर्न आग्रह गर्ने निर्णय भएको ललितपुर महानगरपालिकाका प्रमुख चिरिबाबु महर्जनले बताए ।

उनले पीडिए गर्नको निमित्त धेरै कण्डिसनहरु नेपवेस्टले प्रश्ताव गरेको तथा स्थानीय पालिकाहरुले नेपवेस्टको मागअनुसारको जग्गा दिन नसक्ने र नेपवेस्टको टिओआर (टर्म अफ रेफेन्स) बनाउँदा कुनैपनि पालिका संलग्न नभएकाले यस विषयमा बाँकी काम नेपाल सरकारले नै गर्नेगरी उपत्यकाभित्रको सबै नगरपालिकाको फोहोर व्यवस्थापन गर्नको निमित्त सरकारलाई नै अनुरोध गर्ने निर्णय फोरमले गरेको बताए ।

बैठकले काठमाडौं उपत्यकामा अबबाट स्मार्ट सिटी लाइट जडान गर्दा एउटै प्याकेज गरेर अघि बढ्ने यसअघिको बैठकको निर्णयलाई कार्यान्वयन गर्ने निर्णय भएको पनि मेयर महर्जनले बताए । उनले विद्युत प्राधिकरणले स्थानीय पालिकाहरुको वक्क्यौताहरु सडक बत्ती, मठ, मन्दिर, शिवालय, देवालयमा बालेको बत्तीहरुको बिल भुक्तानीको निमित्त गरेको पत्राचारमा पालिकाहरुले असहमति प्रकट गरेको बताए ।

उनले प्राधिकरणले हचुवाको भरमा पञ्चायतकालदेखिको पनि बिल पठाएको आरोप लगाए । आफूहरु प्रतिनिधि भएर आएपछि बालेको बत्तीको पैसा पुस्ट्याँइ गरेमात्रै बिल भुक्तानी गर्ने निर्णय भएको बताए । नेपाल विद्युत प्राधिकरणले महानगरपालिकाको जग्गामा विद्युतका सामग्रीहरु राखे बापतको सहयोगमा प्राधिकरणले पनि सो सरहको व्यवहार गर्नका लागि उर्जा, जलश्रोत तथा सिंचाईमन्त्री र प्राधिकरणका कार्यकारी निर्देशकसँग फोरमको छिटै अर्को बैठक बस्ने निर्णय भएको पनि बताए ।

मेयर महर्जनले उपत्यकाका महानगरपालिकासँग सरोकार राख्ने काठमाडौं उपत्यकाका नगरपालिकालाई स्मार्ट सिटी बनाउनका लागि धेरै वर्ष पहिलाबाट जग्गा रोक्का गरिराखेको तर स्मार्ट सिटीको सन्दर्भमा काम अघि नबढेकाले स्मार्ट सिटीको काम तत्काल हुनुपर्ने बताए । फोरमको अर्को बैठक तारकेश्वर नगरपालिकाको आयोजनामा बस्नेछ ।

काठमाडौं महानगर, ललितपुर महानगर र उपत्यका भित्रका १६ नगरपालिकाका प्रमुखहरूको संजाल रहेको उक्त फोरमको अध्यक्ष ललितपुर महानगरका मेयर चिरिबाबु महर्जन हुन् । फोरमले उपत्यका भित्रका साझा इस्यूहरूमा काम गर्दै आएको छ । उपत्यका भित्रका सडक बत्ती, स्मार्ट स्ट्रीट लाइट, खानेपानीको व्यवस्थापन, फोहोरमैला व्यवस्थापन, विद्युत आपूर्ति लगायत विभिन्न सेवाका लागि फोरमले नेपाल सरकारलाई सहयोग प्रदान गर्ने, सहकार्य गर्ने, सुझाव दिने काम गरिरहेको छ ।

यसअघि काठमाडौं महानगरका स्वतन्त्र मेयर बालेन शाहले आफूसँग अझै ३ वर्ष समय काम गर्न बाँकी रहेको भन्दै कामाडौको फोहोरको व्यवस्थापन गरिछाड्ने बताएका थिए । काठमाडौंको फोहोर व्यवस्थापन हुदै आएको सिसडोलबासीहरु भने सहमति वमोजिक महानगर र सरकारले काम नगरेको भन्दै आफूहरु वर्षाैदेखि पीडित बन्दै आएको बताएका छन् । उनीहरुले जन्मदै क्यानसर बोकेर जन्मनु पर्ने, जग्गा बेचबिखन नहुने, फोहोर गन्हाएर बस्न, सुत्नै नसकिने अवस्था विद्यमान रहेको तथा फोहोरकै कारण यस क्षेत्रका केटाहरुको बिहेबारी समेत हुन नसकेको गुनासो गर्दै आएका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.