२२ पुष, काठमाण्डौ ।
प्यालेस्टाइनी लडाकु समूह हमास र इजरायल भीषण युद्धमा होमिएको तीन महिना पूरा भएको छ । गएको अक्टोबर ७ तारिखमा प्यालेस्टिनी लडाकु समूह हमासले इजरायलमा आक्रमण शुरु गरेको थियो । त्यसबेला १० जना नेपालीसहित १२ सयले ज्यान गुमाएका थिए । हमासले नेपालका विपीन जोशीसहित २ सय ५० जनालाई बन्धक बनाएको थियो ।
पछि अस्थायी युद्धविरामका क्रममा केहीलाई मुक्त गरे पनि विपीनसहित एक सय ३२ जना अझै हमासको नियन्त्रणमा रहेका अनुमान छ । अर्न एन्ड लर्न कार्यक्रम अन्तर्गत जोशी इजरायल पुगेका थिए । नेपालले यो बीचमा कञ्चनपुरको भीमदत्त नगरपालिका–३ घर भएका जोशीको रिहाइका लागि केही प्रयास गरे पनि अवस्था अझै थाहा हुन सकेको छैन् ।
परराष्ट्रमन्त्री एनपी साउदले जोशीको रिहाइका लागि सरकारको तर्फबाट प्रयास भइरहेको बताउँदै आएका छन् । इजरायल सरकार साथै प्यालेस्टाइनसँग राम्रो सम्बन्ध रहेको कतारसँग पटक–पटक आग्रह÷अनुरोध गरिएको उनको भनाई छ । जोशीलाई हमास समूहले नियन्त्रणमा लिएर गाजातर्फ लगेको बुझिएको छ ।
केही समय अघि अस्पताल लैजादै गरेको विपिनको भनिएको एक भिडियो सार्वजनिक भएको थियो तर यसको स्वतन्त्र पुष्टि र विपिनको अवस्थाबारे आधिकारकि जानकारी आउन सकेको छैन् । अज्ञात अवस्थामा रहेका उनको रिहाइका लागि सरकारले इजरायल, कतारसंगै इजिप्टसँग समेत कूटनीतिक पहल गर्दै आएको छ । तर, उनको रिहाइ हुन सकेको छैन् ।
परराष्ट्र मन्त्री साउद आफैँ उनको रिहाइका लागि पहल गर्न कतार पुगेका थिए । कतार पुगेर त्यहाँका राजा तथा प्रधानमन्त्रीसँग जोशीको रिहाइका लागि पहल गरिदिन अनुरोध गरेका थिए । तर, सरकारले गरेको पहलहरूले सार्थकता पाउन सकेको छैन । नेपालले उनको रिहाइका लागि अन्तर्राष्ट्रिय समुदायसँग गुहार माग्दै आएको छ ।
हमासद्वारा सञ्चालित स्वास्थ्य मन्त्रालयकाअनुसार अक्टोबर ७ तारिखमा लडाइँ शुरु भएयता इजरायलबाट झण्डै २२ हजार ७ सयभन्दा धेरै मानिस मारिसकेका छन् । इजरायलको आक्रमणबाट विस्थापित हुनेहरुको सङ्ख्या पनि बढ्दै गएको छ । गाजामा इजरेलको आक्रमण अझै जारी रहेको छ ।
