२३ पुष,एजेन्सी ।
माल्दिभ्सका मन्त्रीसहित केही अधिकारीहरुद्वारा भारतीय प्रधानमन्त्री नरेन्द्र मोदीमाथि आपत्तिजनक टिप्पणीपछि भारत र माल्दिभ्सबीच अहिले जुहारी चलिरहेका बेला राष्ट्रपति मोहम्मद मुइज्जु चीन पुगेका छन् ।
उनी पत्नी साजिदा मोहम्मदसहित आइतबार राती चीन भ्रमणमा निस्किएका हुन् । यो भ्रमण चीनका राष्ट्रपति सी जिंगपिंगको निमन्त्रणमा भएको हो । राष्ट्रपति मुइज्जूका साथ उच्च स्तरीय प्रतिनिधिमण्डल रहेको छ ।
एक वरिष्ठ अधिकारीले बताएअनुसार दुवै शीर्ष नेताहरु बीचको बैठकले रणनीतिक मार्गदर्शन प्रदान गर्नेछ । साथै द्विपक्षीय सम्बन्धलाई नयाँ उचाईमा पुर्याइने पनि बताइएको छ ।
मुइज्जू र प्रथम महिला साजिदा मोहम्मद ८ देखि १२ जनवरीसम्म चीन भ्रमणमा रहने चिनियाँ विदेश मन्त्रालयका प्रवक्ता हुआ चुनयिंगले शुक्रवार बताएका थिए । मोहम्मद मुइज्जू चीन समर्थक राजनेताका रुपमा चर्चित छन् ।
उनले यसअघिको भारत पहिलो विदेश भ्रमणको परम्परालाई तोड्दै चीन गएका हुन् । यद्यपी यो उनको दोस्रो विदेश भ्रमण हो । यसअघि उनी टर्कि पुगेका थिए । त्यसपछि कोप २८ शिखर सम्मेलनका लागि दुबई गएका थिए ।
अहिले चीन भ्रमणमा रहेको मुइज्जूलाई चिनियाँ राष्ट्रपति सी जिंगपिंगले एक स्वागत समारोहको आयोजना गरेका छन् । सीले चीन र माल्दिभ्सबीच सदियौंदेखि मित्रता रहँदै आएको बताएका छन् ।
कुटनीतिक सम्बन्धको स्थापनापछि पछिल्ला ५२ वर्षमा दुवै देशले एकअर्कासंग सम्मानपूर्वक व्यवहार राखेका छन् । मुइज्जूअघि भने माल्दिभ्सका पूर्व राष्ट्रपतिहरुले भारत भ्रमणलाई पहिलो प्राथमिकतामा राख्दै आएका थिए ।
तर मुइज्जूले न केबल त्यो परम्परा तोडेका छन्, उनले वर्षौदेखि आफ्नो देशमा रहेका भारतीय सेनालाई पनि हटाउन लागेका छन् । यस्तै माल्दिभ्सले भारतसँगको हाइड्रोग्राफिक सर्वेक्षण सम्झौता पनि खारेज गरेको छ ।
