२४ पुष,विराटनगर ।
आज पनि देशका केही भागमा आंशिक बदली भएको छ भने बाँकी भूभागमा मौसम सामान्यतया सफा रहेको छ । चिसो बढेसँगै बिहान तराईका अधिकांश भू–भागहरुमा हुस्सु÷कुहिरो लागेको छ । दिउँसो गण्डकी, लुम्बिनी, कर्णाली र सुदुरपश्चिम प्रदेशलगायत कोशी प्रदेशका पहाडी भू–भागमा आंशिक बदली हुने मौसम पूर्वानुमान महाशाखाले जनाएको छ ।
महाशाखाका अनुसार कोशी, गण्डकी र कर्णाली प्रदेशको उच्च पहाडी तथा हिमाली भू–भागको एक÷दुई स्थानमा दिउँसो र राति हल्का हिमपातको पनि सम्भावना रहेको छ । महाशाखाले आज दैनिक जनजीवन, स्वास्थ्य, यातायात तथा हवाई यातायातमा प्रभाव पर्नसक्ने हुँदा त्यसबाट हुनसक्ने असरका साथै चिसोबाट बच्न आवश्यक उपाय तथा सतर्कता अपनाउन अनुरोध गरेको छ ।
देशभर तापक्रम घट्ने क्रममा छ । उच्च पहाडी तथा हिमाली भेगमा केहीदिनदेखि हिमपात भइरहेका कारण देशभर चिसो बढेको मौसमविद् सञ्जीव अधिकारीले बताएका छन् । जुम्ला, जोमसोम र जिरीको न्यूनतम तापक्रम शून्य डिग्री सेल्सियसभन्दा पनि तल माइनसमा पुगेको उनले बताए ।
आज जुम्लाको न्यूनतम तापक्रम माइनस ५ दशमलव ५, जिरीको माइनस शून्य दशमलव ६ र जोमसोमको न्यूनतम तापक्रम माइनस ३ दशमलव ५ डिग्री सेल्सियससम्म मापन भएको छ । आज लुम्बिनी, कर्णाली, सुदूरपश्चिम र कोशी प्रदेशका पहाडी भेगमा आंशिक बदली रहे पनि तत्काल वर्षाको सम्भावना नरहेको महाशाखाले जनाएको छ ।
