Nepal Times
Nepal Times
3
Shares

ताइवानमा आज आमनिर्वाचन, के भन्छ चीन ?

ताइवानमा आज आमनिर्वाचन, के भन्छ चीन ?

२८ पुष, एजेन्सी ।
चीनले आफ्नो अभिन्न अंग भन्दै चेतावनी दिइरहेका बेला ताइवानमा आज राष्ट्रपति र संसदीय निर्वाचनका लागि मतदान भइरहेको छ । जसमा देशका १ करोड ९५ लाख मतदाता सहभागी हुँदै छन् । वर्तमान राष्ट्रपति साई इङ–वेनले आफ्नो दुई कार्यकाल पूरा गरिसकेकाले यस निर्वाचनबाट ताइवानले नयाँ राष्ट्रपति पाउने निश्चित छ ।

किनकि नियमअनुसार अब उनी तेस्रोपटक राष्ट्रपतिमा निर्वाचित हुन सक्दिनन् । सत्तारुढ ‘डेमोक्रेटिक प्रोग्रेसिभ पार्टी’ (डीपीपी) ले आफ्ना नयाँ अध्यक्ष तथा वर्तमान उपराष्ट्रपति विलियम लाइलाई राष्ट्रपतिको उम्मेदवार बनाएको छ । उनलाई ताइवानको स्वतन्त्रताको कट्टर समर्थक मानिन्छ ।

विपक्षी दल ‘कुमिन्टाङ’ (केएमटी) ले न्यु ताइपेईका मेयर होउ यु–इहलाई उम्मेदवार बनाएको छ । हौ यु–इह चीनसँग घनिष्ठ सम्बन्धको पक्षमा छन् । यद्यपि उनको पार्टीले ‘चीन समर्थक’ भएको कुरा अस्वीकार गरिरहेको छ ।

केएमटीले आजको मतदानलाई ‘शान्ति र युद्धबीचको चुनाव’ भनेको छ । यस्तै ‘ताइवान पिपुल्स पार्टी’ (टीपीपी) ले को वेन–जेलाई उम्मेदवार बनाएको छ । ताइवानको यो चुनावले देशको राजनीतिक भविष्य मात्र होइन, चीनसँगको सम्बन्ध पनि तय गर्नेछ ।

गठन भएदेखि नै ताइवानलाई आफ्नो देशको हिस्सा दाबी गरिरहेको चीनको परराष्ट्र मन्त्रालयले मतदानको एक दिनअघि शुक्रबार फेरि आफ्नो देशको अडान दोहो¥याउँदै ‘ताइवान चीनको हिस्सा हो र विश्वमा एक मात्र चीन रहेको’ भनेको छ ।

चीनको रक्षा मन्त्रालयले शुक्रबार जारी गरेको नयाँ चेतावनीमा भनिएको छ, ‘पिपुल्स लिबरेसन आर्मी सधैँ उच्च सतर्कतामा छ र ‘ताइवान स्वतन्त्रता’का लागि कुनै पनि पृथकतावादी योजनालाई दृढतापूर्वक कुचल्न सबै आवश्यक कदम चाल्नेछ।’ यद्यपि, ताइवानको रक्षा मन्त्रालयले शुक्रबार सामाजिक सञ्जाल साइट एक्समा ‘युद्धका लागि सधैँ तयार’ रहेको बताएको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.