११ माघ,एजेन्सी ।
सामाजिक संजालमा निकै सक्रिय रहने भारतीय प्रधानमन्त्री नरेन्द्र मोदी विश्वमा सबैभन्दा बढी युट्युब सब्स्क्राइबर भएका राजनीतिज्ञ बनेका छन् । उनी विश्वकै पहिलो यस्तो नेता बनेका छन्, जसको युट्युब च्यानलमा २ करोड १३ लाख सब्स्क्राइबर छन् । उक्त च्यानलमा प्रधानमन्त्री मोदीको सम्बोधनदेखि उनका सार्वजनिक कार्यक्रमहरुका भिडियो अपलोड गर्ने गरिएको छ ।
प्रधानमन्त्री मोदीले आफ्नो क्रियाकलाप तथा भाषण आफ्नै युट्युब च्यानलबाट लाइभ गर्ने गर्छन् । उनको भिडियो हेर्नका लागि अन्य च्यानलको भर पर्नु पर्दैछ । जसले गर्दा उनको सब्स्क्राइबर दिन प्रतिदिन बढ्दै गएको देखिन्छ । सोमबार अयोध्यामा राम मन्दिरको प्राणप्रतिष्ठाको भिडियो पनि मोदीको युट्युब च्यानलबाट लाइभ गरिएको थियो ।
उक्त लाइभ करिब १ करोड जनाले प्रत्यक्ष हेरिरहेका थिए । मोदीले युट्युबबाट उच्च आम्दानी पनि गर्ने गरेको पाइन्छ । स्पिकआरजेको एक रिपोर्टअनुसार मोदीले मासिक १७ लाख अमेरिकी डलर (२२ करोड ५६ लाख नेपाली रुपैयाँ) बढी युट्युबबाट मात्रै आम्दानी गर्ने गरेका छन् ।
मोदीले आफ्नो युट्युबमा राखेको भिडियोको भ्यूजको आधारमा वार्षिक न्यूनतम ९२ लाख २१ हजार अमेरिकी डलर(१ अर्ब २२ करोड नेपाली रुपैयाँ) देखि २ करोड ७ लाख अमेरिकी डलर (२ अर्ब ७५ करोड रुपैयाँ) सम्म आम्दानी गर्ने गरेको दाबी उक्त रिपोर्टमा गरिएको छ ।
मोदी मल्टिमिडिया प्रति चनाखो रहने राजनीतिज्ञ हुन् । उनले पहिरनदेखि स्थानीयकरण सम्मलाई विशेष ख्याल गर्ने गरेका छन् । उनी अन्य सामाजिक सञ्जालहरु फेसबुक, ट्वीटर इन्स्टाग्राम लगायतका सामाजिक सञ्जालमा पनि लोकप्रिय छन् । फोटो, भिडियोका लागि मोदी विशेष टीम नै परिचालन गर्ने गरेका छन् ।
भारत विश्वकै धेरै जनसंख्या भएको देश हो । जहाँ १ अर्ब ४४ करोड जनसंख्या छ । संसारभर रहेका भारतीय मूलका नागरिकहरुको समेत संख्या जोड्ने हो भने २ अर्ब हाराहारी हुन आउँछ । संसारमा करिब तीन अर्ब मानिसले हिन्दी भाषा बोल्छन÷बुझ्छन्, जसकारण पनि युट्युबमा मोदीको लोकप्रियता दिनदिनै बढेको छ।
मोदीपछि युट्युबमा सबैभन्दा बढी सब्स्क्राइबर भएको नेताको रुपमा दोस्रो स्थानमा ब्राजिलका जेयर बोल्सोनारो छन् । उनको युट्युब च्यानलमा ६४ लाख सब्स्क्राइबर छन् । त्यसपछि युक्रेनका प्रधानमन्त्री भोलोदिमिर जेलेन्स्की छन् । उनको हाल ११ लाख सब्स्क्राइबर छन् । युक्रेन युद्धपछि उनको च्यानलको सब्स्क्राइबर बढेका हुन् ।
