२२ माघ ,एजेन्सी ।
विश्वका धनाढ्यहरुको सूचीमा शीर्ष १० भित्र पर्न नसकेका भारतीय अर्बपति मुकेश अम्बानी विश्वकै शक्तिशाली सीईओको सूचीमा भने दोस्रो स्थानमा परेका छन् । ब्रान्ड गार्जियनशिप इन्डेक्स २०२४ मा लगातार दोस्रो वर्ष पनि उनी दोस्रो स्थानमा रहेका हुन् ।
यो सूचीको पहिलो स्थानमा भने चिनियाँ बहुराष्ट्रिय प्रविधि कम्पनी टेन्सेन्टका सीईओ हुआतेङ मा रहेकाछन् । हुआतेङले ८१ दशमलव ६ अङ्क पाएका छन् । भारतीय सूचीमा पहिलो र विश्वव्यापी सूचीमा दोस्रो स्थानमा रहेका अम्बानीले भने ८० दशमलव ३ अङ्क पाएका छन् ।
रिलायन्स इन्डष्ट्रिज लिमिटेडका अध्यक्ष तथा प्रबन्ध निर्देशक अम्बानी माइक्रोसफ्टका सत्य नदेल्ला, गुगलका सुन्दर पिचाई, एप्पलका टिम कुक र टेस्लाका एलन मस्कलाई पछाडि पार्दै दोस्रो स्थानमा परेका हुन् । डाइभर्सिफाइड ग्रुपको श्रेणीमा भने मुकेश सबैभन्दा माथि छन् ।
अम्बानीले जुन गतिले आफ्नो व्यापार व्यवसाय विस्तार गरिरहेका छन्, यो हेर्दा उनी छिट्टै नै शीर्ष स्थानमा पुग्ने देखिन्छन् । यो सूचीमा टाटा सन्सका अध्यक्ष एन चन्द्रशेखरन पाँचौं स्थानमा छन् । महिन्द्रा एन्ड महिन्द्राका अनिश शाह छैटौँ स्थानमा छन् ।
इन्फोसिसका सलिल पारेख भने १६ औं शक्तिशाली सीईओ बनेका छन् । ब्रान्ड गार्डियनशिप इन्डेक्सले सबै सरोकारवालाहरू, कर्मचारीहरू, लगानीकर्ताहरू र समाजको हितलाई ध्यानमा राखेर प्रभावकारी रूपमा व्यापार मूल्य सिर्जना गर्ने सिईओहरुलाई मान्यता दिन्छ।
ब्रान्ड फाइनान्स सर्वेक्षणले सन्तुलित स्कोरकार्डको आधारमा सिईओहरूको मूल्याङ्कन गर्छ जसले तिनीहरूको कम्पनीको ब्रान्ड र दीर्घकालीन मूल्यको भण्डारण गर्ने क्षमतालाई समेत मापन गर्छ । फोब्र्सको रियल टाइम बिलिनिर्यस लिस्टमा भने दोस्रो शक्तिशाली सीईओ बनेका अम्बानी ११ औं स्थानमा रहेका छन् ।
