२८ माघ , एजेन्सी ।
क्यानडाविरुद्धको एकदिवसीय अन्तर्राष्ट्रिय क्रिकेटमा नेपालले लगातार दोस्रो जित हासिल गर्दै एक खेल अगावै सिरिजमाथि कब्जा जमाइसकेको छ । नेपालले कीर्तिपुरस्थित अन्तर्राष्ट्रिय क्रिकेट मैदानमा शनिबार खेलिएको दोस्रो खेलमा क्यानडालाई चार विकेटले हरायो । यसअघि पहिलो खेलमा नेपालले क्यानडामाथि सात रनको रोमान्चक जित हासिल गरेको थियो ।
शनिबारको खेलमा नेपालका तर्फबाट तीन ब्याट्सम्यान कप्तान रोहित पौडेल, देव खनाल र अनिल शाहले अर्धशतक बनाए । कीर्तिपुरस्थित अन्तर्राष्ट्रिय क्रिकेट मैदानमा क्यानडाले टस जिती पहिले ब्याटिङ गर्दै निर्धारित ओभरमा नौ विकेट गुमाएर दुई सय ८५ रन बनाएको थियो ।
जसको जवाफी ब्याटिङमा ओर्लिएको नेपालले ४५.१ ओभरमा ६ विकेट गुमाएर दुई सय ८७ रन बनाउँदै विजयलक्ष्य पार गरेको हो । क्यानडाविरुद्ध जित हात पार्ने क्रममा नेपालले त्रिवि मैदानमा तीन कीर्तिमान बनाएको छ । एकदिवसीय अन्तर्राष्ट्रिय क्रिकेटमा नेपालले पूरा गरेको यो दोस्रो ठूलो विजयलक्ष्य हो ।
यसअघि सन् २०२३ को मार्च ९ तारिखमा खेलिएको पपुवा न्यू गिनीविरुद्धको खेलमा नेपालले दुई सय ९८ रनको लक्ष्य पूरा गरेको थियो । त्यो खेलमा नेपालले पपुवा न्यू गिनीलाई ५२ रनले हराएको थियो । यस्तै अनिल शाह सबैभन्दा कम बलमा अर्धशतक पुरा गर्ने ब्याट्सम्यान बनेका छन् ।
उनी दोस्रो विकेटका रुपमा पेभेबेलियन फर्किएका थिए । उनी अर्धशतक बनाउँदै आउट भए । पेभेलियन फर्किनुअघि अनिलले केवल २० बलमा तीन छक्का र सात चौकाको मद्दतले ५० रन बनाएका थिए । यससँगै उनी एकदिवसीय अन्तर्राष्ट्रिय क्रिकेटमा नेपालका लागि सबैभन्दा कम बलमा अर्धशतक पूरा गर्ने ब्याट्सम्यान पनि बनेका छन् ।
अनिलले आसिफ शेखको कीर्तिमान तोडेका हुन् । आसिफ शेखले सन् २०२३ को मार्च १३ तारिखमा कीर्तिपुर मैदानमै खेलिएको आईसीसी क्रिकेट वल्र्ड कप लिग–२ अन्तर्गतको पपुवा न्यू गिनीविरुद्धको खेलमा २१ बलमा अर्धशतक बनाएका थिए । अनिलले भने २० बलमै अर्धशतक पुरा गरेका हुन् ।
यस्तै क्यानडाविरुद्धको खेलमा तेस्रो विकेटकालागि सबैभन्दा ठूलो साझेदारी पनि बनेको छ । ३३.५ ओभरमा देव आउट हुँदा नेपालले दुई सय १४ रन बनाएको थियो । देव र कप्तान रोहित पौडेलले टोलीका लागि एक सय ५० रनको साझेदारी गरेका थिए । नेपालले एकदिवसीय अन्तर्राष्ट्रिय क्रिकेटमा तेस्रो विकेटका लागि गरेको यो नै सबैभन्दा ठूलो साझेदारी हो ।
यसअघि सन् २०२३ को फेब्रुअरी १४ तारिखमा कीर्तिपुरस्थित अन्तर्राष्ट्रिय क्रिकेट मैदानमै भएको नामिबियाविरुद्धको खेलमा तेस्रो विकेटका लागि रोहित पौडेल र कुशल भुर्तेलले एक सय ३३ रनको साझेदारी गरेका थिए । नेपाल र क्यानडाबीचको तेस्रो खेल अब सोमबार विहान कीर्तिपुर मैदानमै हुनेछ । यो खेलमा पनि नेपालले जित हासिल गरे सिरिजमाथि ‘क्लिन स्वीप’ गर्नेछ ।
